Atara Zarata konpainiak ‘Desberdinak’ berreskuratu du
10. urteurrena ospatzeko

Hamarkada bat igaro da Markel Ganboa, Julene Bernaola, Mariano Estudillo, Miren Erdoiza eta Eneko Sagardoyk Atara Zarata konpainia sortu eta ‘Desberdinak’ lehen lana taularatu zutenetik. Orain, 10 urteren ondoren, konpainia durangarrak lana berreskuratu eta antzezle talde eraberritua osatu du urteurrena ospatzeko.

Lehenengo emanaldi hura 2011ko ekainaren 28an eskaini zuten eta horregatik hartu dute egun hura taldearen sorrera egun bezala, nahiz eta “konpainia moduan 2014 sortu ginen. Hasieran bildu ginen bost lagunok, guretzat interesa zuten gaiak antzerkiaren bidez zabaldu nahi genituen, adierazteko gure hizkuntza hori delako”, Markel Ganboaren esanetan.

Hasierako ‘Desberdinak’ taularatu zuten antzezleen lekua, Peio Velasco, Eneko Berasaluce eta Nuria Romero durangarrek, Irati Herreros zaldibartarrak eta Iker Garate izurtzarrak hartuko dute ekoizpen berrian, azken hau zuzendaritza lanarekin ere arduratuko dela.

Hiru emanaldi Sorginolan

Sorginola gaztetxean uztailaren 2an, 3an eta 4an, arratsaldeko 19:00etan, eskainiko diren agerraldietan LGTBI gaia jorratzen duen istorioari taularatuko dute, Sagardoyk egindako dramaturgia duena.

“Gaiak funtsezko atzealdea du, eta nahiz eta barre egiten dugun, orain dela hamar urteko zein gaur egungo gizartean pil-pilean dagoen gaia da. Hortik gure dator gure adierazteko beharra”, Ganboraren arabera.

Hamarkada honetan egindako ibilbideari jarraipena eman zioten ‘Nor Nori Nork’, ‘Los Insignificantes’, ‘Eingo al deu?’, ‘Reinas’ eta ‘Versátil’ ikuskizunek. Gainera, Tabula Rasaren ‘Se Buscan’ eta Juan Rana Producciones konpainiaren ‘La Casa’ lanetan ere parte hartu dute eta bi edizio izan dituen Microteatro proiektua ere sortu dute. “Bataz beste 45 pertsona inguru pasatu dira taldetik eta horietako asko, era batera edo bestera, konpainiako kideak dira oraindik”.

Urteurrenaren ospakizunak hiru agerraldiekin hasiko badira, irailetik azarora bitartean burutuko diren zenbait ezustekorekin osatuko dute urteurrena. “Pandemia garaian gaudenez aurrez-aurreko ospakizunak alde batera uztea erabaki dugu eta egingo ditugun ekitaldi gehienak on-line izango dira. Baina prestatuko ditugun eginkizunen berri emango dugu”, adierazi du.

Sorginolan eskainiko dituzten emanaldietarako sarrerak salgai daude dagoeneko 4 euroren truke entradium.com/events/desberdinak-10-urteurrena webgunean.