Antzinako akelarreetara bidaia, Kriskitin Taldearen eskutik

Durangoko Kriskitin taldeko dantzari, musikari eta kantariek ‘Akelarrea’ ikuskizuna eskainiko dute Elorrion, udako solstizioari ongi etorria emateko. Nobedade moduan, Juan Antonio Aromak sortutako koplak aurkeztuko dira. Saioa gaur ospatuko da, San Roke auzoan, 22.30ean.

Urteko egunik luzeenaren eta gaurik laburrenaren magian murgilduz, udako soltizioa iragartzeko, dantza eta musika ikuskizuna da.

Elorrion eskaini zuen estreinako aldiz Kriskitinek ikuskizuna 2006an. Harrezkero hainbat lekutan izan da: Durangon, Sopelan, Abadiñoko Gerediagan, Bakion eta Mungian. Urterik urtera ikuskizuna hobetzen eta borobiltzeko ahalegina egin du Kriskitinek. Aurtengo berrikuntza, ikuskizunari amaiera emateko,  Jose Antonio Aromak sortutako koplak izango dira.

“Akelarrean egiten diren gauza guztien artean dantza, musika eta alaitasuna da nagusi, gizon eta emakumeen arteko hurbiltasunerako ohikoena eta bazter ezin den ekintza. Garai bateko gizandreak ostera, gaitzetsi, zigortu eta erre egin zituzten, derrigorrean horrelako aitorpenak egin ondoren”, gogoratu dute Kriskitinetik.

Beraz, taldeak egingo duen bidaian aspaldiko akelarreetako gizandre haiek gogoan izango dituzte, eta bide batez “haien askatasun egarria eta dantzaz gozatzeko grina kutsatzen ahaleginduko gara elorriar eta ikuskizunera hurbiltzen diren guztiei”, gonbidapena luzatu dute.