‘Zapping’film labur lehiaketa ospatuko da asteburu honetan Plateruenan

‘Zapping’ film labur lehiaketa antolatu du aurten ere Durangoko Zapaburu Gazte Konpartsak. 24 ordutan burutuko den ekimena larunbat honetan, apirilak 11, arratsaldeko 15.00etan hasiko da Plateruena Kafe Antzokian, ordu horretan emango baitira gaia eta lehiaketako baldintzak.

“Gure barruaz barre egin eta besteen filmek eragingo dizkiguten emozioekin gozatzea” helburu duen ekimenean parte hartzeko, beharrezkoa da izena aldez aurretik ematea zapaburukonpartsa@gmail.com helbidean. Apuntatzeko azken eguna osteguna, apirilaren 9a, da.

Izena emandako partaideen lehen hitzordua apirilaren 11n izango da arratsaldeko 15.00etan, ordu horretan emango baitituzte epaimahaiko kideek film laburraren grabazioan jarraitu beharreko gaia eta baldintzak. Hortik aurrera 24 ordu izango dituzte partaideek ideia asmatu, gidoia landu, pertsonaiak aukeratu, grabazioa gauzatu eta gehienez zortzi minutuko iraupena izango duen pelikula egiteko.

Lan guztiak pen drive baten entregatu behar dira, izenarekin batera, igandeko 15.00ak orduko Plateruenan. Lanen formatuak MPEG edo AVI izango dira.

Lehiaketara aurkeztutako pelikula guztiak Plateruenan arratsaldeko 18.00etan hasiko den emanaldian izango dira ikusgai eta jarraian sari banaketa hasiko da.

‘Zapping’ film labur lehiaketaren asmoa “barruko sorkuntza gogoari irteten utzi, irudimenari lekua egin eta gure gaitasunei, konfiantza guztiz, aukera bat ematea da”, Zapaburuko kideen arabera. 

Iaz ospatutako lehen edizioan 12 taldek eman zuten izena, nahiz eta azkenean izena emandako biren lanak ez ziren lehiaketara aurkeztu. Iazko irabazleak Amaia Zaitegi, Pello Baños, Jon Aramendi eta Eloi Landiak osatutako laukotea izan zen eta emandako gaia ‘Argia’ izan zen.