‘Konpota’, Zubi egitasmoaren lehenengo lana estreinatuko dute Durangon

Euskal antzerki sorkuntza bultzatzeko Zubi deritzon parte-hartze proiektuak, lehenengo emaitza aurkeztuko du Durangon. ‘Konpota’ antzezlana San Agustin Kultur Gunean estreinatuko da datorren igandean, 19.00etan, Azokaren Szenatokia gunearen barruan.

Dxturi Teatroren Eneritz Artetxeren aktoresaren lan honek euskal antzerki sorkuntza sustatzeko Zubi egitasmoaren babesa jaso zuen, San Agustin proiektu horren partaide izanik. Philippe Gaulier-en ‘La compote de…’ bakarrizaketaren euskarazko bertsioa da. Antton Lukuren itzulpen honi esker, Gaulierren lanaz gozatzeko aukera izango da euskaraz lehen aldiz.

Zazpi kidek, Iparralde zein Helgoaldekoak, sortu zuten Zubi ekimena: Durangoko San Agustin, Zornotza Aretoa, Elorrioko Arriola Aretoa, Kultur Leioa, Aulestiko Artedrama Euskal Laborategia, Lapurdiko Harri Xuri-Karrikako arteen fabrika eta Baxe Nafarroako Herri Antzokia, hain zuzen ere.

Zubiren izenean Filgi Claveriek izan da gaur goizean eman duten prentsaurrekoan. Claveriek esan duenez, ‘Konpota’ egitasmo honen “lehen fruitua da eta oso freskoa gainera” eta datorren urtean deialdi berriak izango dira. “Sortu genuen tresna beharrezkoa izan da bederen”, esan du Calvieriek.

“Emakume bufoia”

Dxturi teatroko Eneritz Artetxe aktoresa eta Pablo Ibarluzea zuzendariak izan dira ere aurkezpenean. Artetxek aurreratu duenez, “babes ekonomiko ezezik, teknikoa ere eman dute. Bihotzeko babes hori eskertzekoa da”. Antzezten duen pertsonaiari buruz, Artetxek aurreratu du “erregistro ugariak lantzeko aukera izan dut, pertsonaia batean”.

“Aktore bezala, beti nahi izan dut sakondu bufoiaren eremuan. Gaulierren testua irakurri nuenean konturatu nintzen bila ari nintzena aurkitu nuela, emakume bufoi batentzat idatzia zegoelako eta ematen zidalako aukera amorruaz eta emakumearen errebeldiaz hitz egiteko”, azpimarratu du Artetxek

Pablo Ibarluzeak zuzendariak, berriz, ‘Konpotaren’ inguruan aritu da eta “pertsonaia erlijioso ia mitologiko baten inguruan berba egiten duela” aurreratu du. Testu oso “dinamikoa da”, eta “etengabe tragedia eta komedia” uztartzen ditu, esan du zuzendariak.

DURANGON. Durangoko albisteak