Zortzi urte beteko ditu “beti-betiko” Plateruenak

Durangoko Plateruena Kafe Antzokiak zortzi urte beteko ditu aurten. Denbora honetan Durangaldeko herri bizitzan leku bat egitea lortu du kulturguneak. Urteurrena ospatzeko datorren ostiralean, hilaren 26an, elkartuko dira “plateruak” ekitaldi batean. Arratsaldeko 20.30ean hasita, musika, dantza, poesia, irudiak, janedana eta lagunartea izango dira protagonistak.

Duela zortzi urteko urriaren 28 batean zabaldu zuen lehenengoz ateak Durangoko Plateruenak. “Sorrera ezagutu genuenontzat ez dira urte asko, baina gaur hemezortzi urte dituen gaztearentzat bizitza osoa da, beti ezagutu baitu Plateruena zabalik”, gogoratu dute. Izan ere, Antzokia “beti-betikoa” den espazioa izatea lortu dute.

Datorren ostiralean izango da ekitaldia. Nahiz eta “plateruei” zuzenduta, saioa zabala izango da. Bertan, Durangaldeko hainbat sortzaileren parte-hartzea espero da.

‘Lokaletik at’

Zortzi urte eta gero, erronka berriei aurre egiteko prest dago kulturgunea. Badira zazpi urte, Berbarorekin batera, Olgetan proiektua martxa jarri zutela. Aurten beste pauso bat eman du eta formatua aldatu dute. Horretarako bost ikuskizun eskainiko dituzte. Estreinaldia abenduaren 2an izango da. Bestalde, ‘Aiko’ dantza ikastaroak eta  lagun artean kantuan egoteko, ‘Kantulagun’ proiektuak martxan jarraituko dute.

Durangaldeko talde hasiberrientzako eszena izango da ‘Lokaletik at’ egitasmoa. Hilean kontzertu bat egongo da hiru taldeekin, eta lanik argitarau bako taldeei begira antolatutako ekimena da. ‘Kantuaren kantoi’ berbaldi musikatuen zikloaren laugarren edizioari ekingo diote aurten. Jonan Hernandezek kazetariak gidatuko ditu berbaldiak.

DURANGON. Durangoko albisteak