Ume eta gurasoei zuzendutako ‘Zabu Zibu’ programa hasi da

Durangoko Merinaldearen Euskara Zerbitzuak euskararen familia transmisioa jolasaren bidez landu nahi duen ‘Zabu Zubi’ egitasmoari ekingo dio aurten ere. 3 eta 5 urte arteko ume eta euren gurasoei zuzenduta dagoen proiektuaren helburua “jolastoki eta parkeetako jolas saioak dinamizatzea” da.

 “Iazko emaitzak ikusita”, Amankomunazgoko Euskara Zerbitzuak euskararen transmisioa indartu nahi du ekintza ludiko hauen bitartez, guraso zein umeei horretarako baliabideak emanez.

Zabu Zibuk helburu duen euskararen familia transmisioa gauzatzeko, Urtxintxako elkarteko dinamizatzaileen partaidetzaz gain, beharrezkoa du familiakoen edo gurasoen parte hartzea ere, eurek baitira gaztetxoen erreferentzia.

Honelako ekimenak “euskera transmisioa lantzeko oso interesgarriak dira”, Amankomunazgoko lehendakaria den Oska Zarrabeitiaren esanetan. Egitasmo honi esker, euskararen familia transmisioa jolasaren bidez landuko da, modu desberdinetan. Izan ere, hizkuntzaren transmisioa ez da soilik gurasoengandik umeengana ematen, baita umeengandik gurasoengana, umeek beste umeei edo gurasoek beste guraso batzuei.

%61,75 gaztelaniaz

Jasotako datuen arabera, Durangaldeko familien %61,75 gaztelaniaz mintzo da etxean, naiz eta azken urteetan haur eta gazteen artean euskararen ezagutza asko handitu den. Egoera horren atzealdean  arazo ugari egon daitezke. Esaterako, guraso euskaldunek, sarritan, ez dutela behar adina baliabide seme-alabekin euskaraz jolas egiteko; haur eta gazte askok ez dutela bizitasunik aurkitzen euskaraz lagunartean komunikatzeko garaian edo euskaraz aritzeko ohitura falta, besteak beste.

Egitasmoa eskualdeko zenbait herrietan burutuko da iraila, urria eta azaroan zehar eta herriak, egunak eta orduak www.durangaldeaeuskaraz.eu webgunean ikusgai daude.