Korrika 23 Zaldibar eta Mallabin barrena izan zen atzo.

Atzo Zaldibar, Mallabia eta Ermua zeharkatu ondoren, Korrika 23 Zornotzan eta Durangaldean murgilduko da bihar arratsaldean, iluntzean eta gauean, ‘Harro Herri’ goiburua lau haizetara zabaltzeko.

Eskualdean berriro sartzen denerako, lasterraldiak 2157 kilometro egin baditu ere partaideek oraindik beste 543 kilometro egin beharko dituzte Baionako helmugara heldu aurretik; horietatik 60 inguru eskualdean.

Zornotza Mendi Taldeak Lemoako mugan hartuko du lekukoa 17:37an, eta ondoren beste 37 elkarte, kirol eta kultura talde, enpresa, alderdi eta bestelako erakunde, negozio edo Udalak eta Udaleko langileek eramango dute barruan euskararen aldeko mezua daraman testigua. Erdiguneko kaleak eta auzoak zeharkatu ondoren, N-634tik Montorra, Euba eta Bernatik pasatuko da Iurretara heldu aurretik.

Iurretatik Berrizera

Arriandin jasoko dute lekukoa iurretarrek eta Bidebarrieta, Askondo eta Maspe kaleetatik pasatuko da, berriro N-634tik Traña-Matienara heltzeko. Abadiñoko auzoa zeharkatu ondoren, berriro errepide nazionaleko bidea hartuko du Berrizera heltzeko, eta herrigunea eta Olakuetara heldu ondoren, Elorriorantz joango da

Miotako gaina igarota, herrigunean sartuko da Labakuatik, eta Erreka, Nizeto Urkizu eta Elizburu kaleak zeharkatu ondoren, Atxondorako bidea hartuko du. Apatamonasterion sartu-irtena egingo du eta berriro Abadiñon sartuko da Muntsaratz eta Zelaietan barrena.

BI-732 errepidea hartuta, Durangon sartuko da San Fausto auzotik. Larrasoloeta kaletik Alde zaharrera joango da eta Juan Mari Altuna kalea eta Landako etorbidera igaro ondoren Askatasun etorbidea eta Galtzareta kaletik Izurtzako bidea hartuko du. Ondoren, indarrak hustu ez dituzten korrikalariek Mañariara helduko dira eta handik Urkiolako igoerari ekingo diote.

BI-623 errepidetik Urkiola gaina zeharkatuko du lekukoak eta Amaitermin pasatu ondoren Otxandion sartuko da gauerdia aldera, eskualdea eta Bizkaiko lurraldea atzean uzteko eta Arabako Legution sartu-irteera egingo du Gipuzkoarantz hartu orduko.

Korrika kulturala

Amorebieta-Etxano
Martxoak 21
Korrika Txikia
10:00etatik aurrera: Andra Mari Ikastola, El Carmelo ikastetxea, Karmengo Ama ikastetxea eta Larrea Eskola.

Martxoak 22
17:00. Mamiki batukada.
Korrika pasatu ondoren, Diskorrika.
20:00etan, ‘Almazenean’ antzezlana, Zornotza Aretoa.

Durango
Martxoak 21
19:00. ‘Euskaldungak’ antzezlana San Agustin Aretoan.

Martxoak 22
17:30. Aurpegi margoketa, puxika tailerrra, igel txapelketa, Otamotzena auzo elkartean.
18:30. Triki poteoa auzoko tabernetatik.
19:00. Bertso saioa: Sustrai Colina, Irune Basagoiti eta Erika Lagoma. Gai jartzailea: Unai Iturriaga.

Abadiño
Martxoak 21
‘Udalatx, ura eta atxa’ filma, Txanporta kultur etxean

Martxoak 22
16:30. Askaria eta Iluntze dantza taldeak eta Street Danceko eskola-taldeak, Traña Plazan.
20:00. Hanburgesak, Zelaietan.
20.00. Eingo taldearekin erromeria.

Berriz
Martxoak 22
11:00.Korrika Txikia.
18:15. Diskorrika.
20:00. Isk&Bila txaranga.

Elorrio
Martxoak 22
11:00. ‘Bizkarsoro’ filma, Arriola antzokian.
14:30. Korrika Txikia.
15:00. Txokolatada.
18:30. Diskofesta Dj Kaktus, Herriko plazan.
18:30. Fanfarrixo txaranga, herrian zehar.

Martxoak 23
20:00. ‘Baginaren bakarrizketak’, Arriola antzokian.

Iurreta
Martxoak 22
11:00. Korrika Txikia.
19:00. Burrunba elektrotxaranga, plazan.
19:40. Korrika koreografia, plazan. (ETB 1eko Biba Zuek! saioak zuzenean emango du).
20:00. Oilasko pintxoak, Askondon.

Izurtza
Martxoak 22
20:30. Pintxpotea eta Dj EkRamirez, Herriko tabernan

Mañaria
Martxoak 22
20:30. Rakata punk elektrotxaranga.
23:30. Xabi Solano eta Zigoz Dz

Atxondo
Martxoak 22
Goizean, Korrika txikia
Arratsaldean, kalea animazioa
21:30. Herri afaria, frontoian.
Ondoren, Djak gaztetxean.

Mallabia
Martxoak 21
19:00. ‘Bizkarsoro’ filma, Kontzejuzarrean.

Otxandio
Martxoak 22
Goizean, Korrika Txikia.
Arratsaldean, pelota partiduak, afari merienda, Aiko taldea.

La entrada Korrika 23 Zornotzara helduko da bihar eta ondoren Durangaldea osoa zeharkatuko du se publicó primero en durangon.com.

Abadiñoko Udalak hainbat ekitaldi antolatu ditu martxoaren 22ko arratsalderako, egun horretan euskararen aldeko Korrika ekimena udalerritik igarotzen dela eta. Lasterraldia Traña-Matienatik 19:18ak aldera sartuko da Abadiñon, Zelaietatik igaroko da berriro 21:24ak aldera, eta Urkiolatik 23:30ak inguruan.

Prestatutako ekitaldiak 16:30ean hasiko dira Traña plazan, txikientzako egingo den askariarekin eta ondoren Iluntze dantza taldeak eta Street Danceko eskola-taldeak eskainiko dituzten agerraldiekin.

Behin Korrika Traña-Matienatik igarota, programazioa Zelaietako Txanporta plazara aldatuko da. 20:00etan hanburgesak dastatzeko aukera egongo da, eta txartelak 3 eurotan salduko dira martxoaren 18tik aurrera Errota Kultur Etxean eta Udal Mediatekan.

Arratsaldea girotzeko, 20:00etatik 21:00etara, eta Korrika igaro ondoren, 22:00etatik 23:30era erromeria izango da Eingo taldearekin. Aurreikusten denez, lasterketa 23:34ak aldera iritsiko da Urkiolara.

‘Bizkarsoro’ filma domeka honetan

Korrika Abadiñora heldu aurretik, domeka honetan, hilak 17, 18:00etan, ‘Bizkarsoro’ filma proiektatuko da Errota Kultur Etxean. Bertaratzeko gonbidapenak eskuragarri daude Errota Kultur Etxean eta Udal Mediatekan.

Josu Martinezek zuzendutako ‘Bizkarsoro’ filma fikzioa bada ere, Euskal Herriko edozein herri izan daiteke, eta bertako biztanleak euskaraz bizitzeagatik jazarriak izan dira. Ikus-entzunezkoan 1914 eta 1982 artean gertatutako bost istorio azaltzen dira.

“Zorionez, Korrikak hiru ordutegi desberdinetan bisitatuko gaitu. Beraz, jendea emozionatuta dago, ospatzeko gogoz, eta asko inplikatu da Korrikari harrera egiteko prestaketetan”, Naiara Bildosola Hezkuntza eta Euskara zinegotziak aitortu duenez. Hori dela eta, hainbat elkarteren eta jende askoren laguntzarekin prestatuko egitaraua osatu dute eta jai giroko arratsaldea zirraragarria izango da “gure hizkuntzaz eta kulturaz gozatzeko”.

La entrada Abadiñon ekitaldi ugari prestatu dituzte martxoaren 22an igaroko den Korrika animatzeko se publicó primero en durangon.com.

Mallabiko Udalak eta herriko elkarteek hainbat ekitaldi antolatu dituzte martxoaren 20an herritik igaroko den Korrika 23ren harira. Euskararen aldeko lasterraldia eta horren inguruan antolatutako ekitaldi kulturalak bihar bertan aurkeztuko dira.

AEK-k eta Gazte Alaiak dantza taldeak antolatutako aurkezpena 19:00etan hasiko da frontoian. Bertaratzen diren guztiekin argazkia egin ondoren, luntxa, dantza ekitaldia eta irakurraldi musikatua egongo dira.

Barikuan, trikipoteoa egongo da 19:00etatik aurrera, eta domekan Durangaldeko Txistulari Eguna ospatuko dute, ekitaldi nagusia 12:00etan Andra Mari elizan eskainiko duten kontzertua izango dela. Superigandea ere ospatuko dute; goizean haurrentzako jolasak egongo dira eskolako frontoian eta arratsaldean pelikula bat proiektatuko da Kontzejuzarrean.

Korrika Mallabin

Korrika 23 eguaztenean, hilak 20, igaroko da Mallabitik zein Ermutik eta udalerri bietako herritarrek elkarrekin egingo dituzte hainbat kilometro. Edizio honetan lasterraldia Elgetatik gerturatuko da eta Aixolako presan jasoko dute lekukoa 8:47an. Eitzaga ingurura 9:06ak aldera gerturatuko da eta Mallabin 09:24ean sartuko da. Areitio gaina 9:40an zeharkatuko da eta udalerritik igaro ondoren Ermuko Arizmendira helduko da 10:00etan.

Egunerako Mallabin prestatutako egitaraua 15:00etan eskolatik abiatuko den Korrika Txikiarekin, 16:00etan egingo den txokolatadarekin eta 16:30ean hasiko den disko festarekin osatuko da.

Egitarauan martxoaren 21ean, 19:00etan, Kontzejuzarrean emango den ‘Bizkarsoso’ filmaren emanaldia ere tartekatu dute.

Bestalde, autobusak antolatu dituzte martxoaren 24an Baionara gerturatzeko, Korrika 23a Lapurdiko hiriburuan amaituko baita.

La entrada Bihar aurkeztuko dute Mallabin martxoaren 20an herritik igaroko den Korrika 23 se publicó primero en durangon.com.

Amorebieta-Etxanoko Udalak hainbat kultur ekitaldi antolatu ditu martxoaren 14tik 24ra egingo den Korrika 23aren harira, egitarauan pailazoak, erakusketak, antzerkia, zinema eta hitzaldiak iragartzen baitira. Amorebieta-Etxanoko AEKk gaur bertan egingo du ekimenaren aurkezpena, 19:00etan Zelaieta Zentroan.

Bihar arte ikusgai dagoen ‘Korrikaren historia irudietan’ erakusketa Zelaietan jarri dute. Bertan jarritako informazio-panelak argazkiak, lemak, logoak edo egindako omenaldiak biltzen dituzte, historian atzera egiteko aukera emanez.

Euskararen aldeko lasterketa herrikoia martxoaren 22an igaroko da herritik eta ordura arte hainbat ekitaldi iragartzen dira.  Otsailaren 9an eta 10ean bereziki haur eta gazteei zuzendutako Porrotx eta Marimotots pailazoen ‘Ez gara jaitsi!’ ikuskizuna eta Basakabiko gazteek ‘Go!azen 10.0’ telebista saioan oinarritutako agerraldiak izango dira, hurrenez hurren.

‘Euskaldungak’en estreinaldia

Tautelak konpainiako Maite Lopez eta Aroa Blanco aktoreek ‘Euskaldungak’ antzezlanaren behin betiko estreinaldia eskainiko dute otsailaren 16an, Ikuskizunak euskaldun berri baten eta euskaldun zaharraren eta euskararen arteko harremanari helduko zaio, gogoeta kulturala eta linguistikoa eskainiz.

Bizkarsoroko herriaren fikziozko historia kontatzen duen ‘Bizkarsoro’ filma otsailaren 29an izango da ikusgai. Josu Martínez zuzendariaren ikus-entzunezkoak 1914 eta 1982 bitartean gertatutako bost istorio kontatzen ditu, ahozko lekukotasunetan eta testu idatzietan oinarritua.  Fikziozko herrian oinarritutako kontakizun hunkigarriak, euskaraz bizitzeagatik jazarriak izan diren euskaldun guztiak irudikatzen ditu.

‘Pantailak Euskaraz, ezinbesteko erronka’ solasaldia prestatu dute martxoaren 12rako, hizlariak Patxo Larrinoa (Pantailak Euskaraz) eta Mikel Eizagirre (Zer Non Ikusi) izango direla. Pantailetan euskararen presentzia sustatzen duen Pantailak Euskaraz ekimenean oinarritzen da ekitaldi hau. Hitzaldia euskaraz izango da, eta Telegram aplikazioaren bidez gaztelaniarako interpretazio-zerbitzu bat izango du, hala behar dutenentzat (beharrezkoa da entzungailuak eramatea).

Korrika 23 Zornotzan

Korrikaren 23. edizioak martxoaren 22an zeharkatuko ditu herriko kaleak, 17:30etatik aurrera. Egunean zehar, kaleak musikarekin animatuta egongo dira eta, Korrika igaro ondoren, familientzako musika-ikuskizun bat egingo da Herriko plazan. Eguneko ekitaldiak Txalo konpainiak Zornotza Aretoan eszenaratuko duen ‘Almazenean’ antzezlanarekin amaituko da.

Amorebieta-Etxanoko Udalak Zornotzako bizilagunak gonbidatu nahi ditu kultura-jarduera horietan parte hartzera eta martxoaren 22an, Korrika Zornotzako kaleetatik igaroko den egunean, euskararen ospakizunarekin bat egitera animatzen ditu.

La entrada Kultur egitarau zabala prestatu dute Zornotzan Korrika 23aren harira se publicó primero en durangon.com.