Zumegintzaren magia

Krisia gogor baino gogorrago ari da bazterrak astintzen. Urrunago joan barik, Durangaldean orain dela 5 urte baino 4.200 langabetu gehiago dago, baina ez da nahikoa krisia gora eta behera aritzea, soka edo euskarria aurkitu behar dugu zulo sakon honetatik irteteko.

Adituen ustez krisi garaian sormena bizkortu egiten da, beharrizana bezalakorik ez ei dago asmamena suspertzeko. Edozelan be gurean badira imajinaziodun ekintzaileak. Lan aukera berriak eskaintzen dituzten lanbide zaharretan jardutea izan daitekeela krisitik irteteko zirrikituetariko bat diote ekintzaileok, eskulangintzan aritzea.

Jakin badakigu eskulangintzatik bizitzea zaila dela, halan da be, eskulangintzatik bizi direnen bizi kalitateari erreparatzea ondo legoke eta, beste zenbait lanbidek sortzen duten estresarekin konparatzea.

Gaur egun, oraindik hainbat lanbide zaharrek dirau bizirik, badaude desagertzeko zorian daudenak ere. Oraintsu zumegintzaren magia ezagutzeko parada izan dut lanbide horretan aritzen diren artisau jaioei esker eta, haiengandik jasotakoa interesgarri irudituta zuekin partekatu nahi nuke.

Zumearekin hainbat gauza egin daitezke. Sektorekoen iritziz lan aukera berriak ditu zumagintzak, hala nola;

• Otzaragintza.
• Arkitektura berdea.
• Barne espazioen diseinua.
• Kanpo espazioen diseinua: jolaslekuak, lorategiak, parkeak, erakustazokak, hesiak???
• Eskulturgintza

Argi dagoenez, lehenengo eta behin lanbidea ikasi egin behar baina, horretarako badago doako ikastaro bat Ozaetan (Araban), Garaion elkarteak antolatuta. Ekainaren 6an hasiko da ikastaroa. Interesatuta egonez gero 945063245 telefonora deitu.

Sarean ere zumegintzari buruzko informazio zabala dago, hementxe adibide batzuk:

http://www.pontdequeros.com/cas/

http://canyaviva.com/

http://www.timjohnsonartist.com/

http://www.scottishbasketmakerscircle.org/

http://www.wildworks.org.uk

http://www.jonwarnes.co.uk/

http://www.bechbaskets.net/

Marisa Barrena psikopedagogoa da