Saharako emakume gidariak

Saharako eremu latzetik berri pozgarri bat heldu zaigu. Behintzat, hala iruditzen zait niri. Ghalia y Mana ahizpek autoeskola bat zabaldu dute Tindufeko Dajla kanpamenduan.

Zer dela eta bururatu ote zaie? Beharrizanak gure irudimena eta asmamena piztu egiten omen ditu eta, kasu honetan horrela dirudi.

Egun batean, 22 urteko Mana gaztea erditze minak sentitu eta ospitalera eraman zuen auzoko gizonezko batek bere automobilean, arrapaladan. Ahizpa Ghaliak ere lagundu zion. Presaren eraginez baina, Manaren oheko erropak eta jaioko zen umearenak ez zituzten hartu. Hortaz, Ghaliak kanpamendura itzuli behar izan zuen erropatan. Kotxerik ez zuenez, oinez egin behar izan zuen etxerainoko bide luzea, bero ikaragarria jasanez. Gauza bera bueltan.

Joan etorriak lehertuta utzi zuen. Egun horretan, Ghaliak, gidatzen ez jakiteak suposatzen zuen muga inoiz baino argiago ikusi zuen eta, ospitalera heltzean, ahizpa Manarekin partekatu zuen bere inpotentzia eta frustrazioa.

Kikildu ordez ostera, ahizpa biek plan bat egin zuten ospitalean bertan.”Gidatzen ikasi behar dugu” pentsatu zuten. “AUTOESKOLA bat zabalduko dugu emakumeok gidatzen ikasteko eta egoera hau aldatzeko” erabaki zuten. Eta, esan eta egin.

Handik gutxira lortu dute euren ametsa. Tindufeko Dajla kanpamenduan emakumeentzako autoeskola martxan da. Lau emakumek kudeatzen dute. 100 ikasle aurreikusten dituzte datozen 8 hilabeteetan. Mana izango da zuzendaria eta Ghalia haren laguntzailea. Irakaslea ere aurkitu dute.

Pauso garrantzitsua iruditzen zait Saharako emakumeentzat. Urrats handia bizimodu gogorra duten kanpamenduetako andrentzat. Esanak esan, han ere emakumeak bigarren mailakoak baitira. Nire ustez, Mana eta Ghaliaren inguruko emakumeek eskertuko dute haien ekimena. Ezohikoa izango da kanpamenduetan emakumeak bolantean ikustea baina, ohituko dira.

Mana eta Ghaliaren ekimenak arrakasta izatea espero dut. Gidatzeak ez dizkigu kate guztiak hausten baina, gidatzen jakiteak askatasuna handia ematen digu eta neurri batean, gizonen menpekotasunetik libratzen gaitu. Laburbilduz, autonomia irabazten dugu gidatzen jakinda.

Marisa Barrena psikopedagogoa da