Editatoia

Gutariko askok jotzen dugu Wikipediara informazio bila. Diotenez, Wikipedia da Interneteko kontsultarako web garrantzitsuena. Baina zer da Wikipedia? Wikipedia lan boluntarioz egindako entziklopedia askea da. Interneteko edozein erabiltzaileren ekarpenez elikatzen da, edonor izan daiteke elikatzaile, hori bai,  jasotako informazioa gainbegiratu, zuzendu eta antolatzeko administratzaileak daude.

Zoritxarrez baina, beste arlo askotan lez, Wikipedian emakumeei buruzko artikulu oso gutxi daude, gizonei buruzkoak baino askoz gutxiago. Desoreka nabarmena da. Ondorioz emakumeak oraindik ere ikusezin dira herritar gehienentzat, zientziaren eta literaturaren esparruan batez ere.

Non daude emakumeak ? Non dira andrak?

Ezagutu eta aitortu beharreko emakumeak egon dira historian zehar eta gaur egun ere badaude, baina bistaratzea falta zaie. Hutsune hori betetzera dator EDITATOIA ekimena.

Joan den asteazkenean Leioako Campuseko Biblioteka Nagusian aritu dira hainbat partaide, idazle eta zientzialari emakumeak ikustaraztea helburutzat hartuz, Wikipedia elikatzen.

Gasteizen berriz, asteburu honetan izango dute hitzordua. Antolatzaileen esanetan, eginkizuna anitza, inklusiboa eta aldarrikagarria izatea nahi dute. Bretxak haustea eta Interneten zein Wikipedian emakumezkoak ikusgai egitea da Gasteizko Saregunekoen xedea.

Benetan, interesgarria deritzot Editatoia ekimenari, izan ere, teknologian, literaturan eta edozein giza alorretan emakumeen ereduak edukitzea ahalbideratzeko bide egokia da. Ereduak eta erreferenteak  ezinbestekoak baitira askotan aipatu dugun patriarkatuaren atzaparretatik ihes egiteko eta dagokigun lekua lortzeko.

Eta, eskualde mailan ere Editatoia antolatuko bagenu? Hainbat arlotan gailendu diren eskualdeko emakumeei buruz Wikipedian artikuluak sortu, zabaldu edo hobetzeko? Emakumezko idazle, zientzilari, kirolari, musikari, politikari eta aktibista ugari dugu gure inguruan, egingo diegu tokia Wikipedian?

Marisa Barrena psikopedagogoa da