Bolbora burrundada

Gabon jai hauetan gure inguruan bolbora burrundada itzela jasan dugu;  petardo, bolandera, etxaflero, txapligo, traka…denetarik egon da. Gabon Zahar gaueko danbadek berriz, orain arteko marka guztiak hautsi dituztela esango nuke.

Zorionez, ez dut istripurik egon denik entzun. Halere, jolas arrikutsua iruditzen zait, kontuan izanik gaur egun erabiltzen diren zenbait petardo eta txapligo potenteak direla eta edozelan eta edonondik botatzen direla. Gogoratu  bolandera batek Pasaian eraikin oso bat erre zuela orain zenbait urte. Gainera, zalantza barik, abarrots hauek, arriskutsuak izateaz gain, desatseginak ere badira. Ume txikiei, pertsona nagusiei, zein abereei berriz, sustoa edota beldurra ere eragiten diete.

Behin baino gehiagotan galdetu diot neure buruari, zein  emozio mota eragiten ote duen zarata atera behar horrek. Poztasuna adierazteko modua ote da? Ezin ote diogu beste era batean harrera egin Urte Berriari?  Neurri batean kontsumo gizartearen eragina dela iruditzen zait.

Edozelan be, uste dut bolbora erabilera hau arautu egin behar dela. @txargain lagunak debekatzea proposatu zuen twitter bidez eta hainbat agertu ziren ados. Ez dakit noraino debekatu behar den baina, gutxienez, hasteko, beharrezkoa da petardoak eta bolanderak botatzeko edo trakak eztandarazteko denbora eta lekuak mugatzea, nik uste.

Ea, arauez gain, sormena eta irudimena erabiliz, 2018ari alaitasunez agur esateko burrundada gutxiagodun eraren bat asmatzen dugun.

Marisa Barrena psikopedagogoa da