Gipuzkoako kostaldea zeharkatuko du Zornotzako ‘Ibiliaz ezagutu’ ekimenak

Zornotzako Udaleko Ametx erakunde autonomoak udazkenerako sortutako ‘Ibiliaz ezagutu’ ekimena hasiko du asteburu honetan eta bertan parte hartzen dutenek Gipuzkoako kostaldea oinez ezagutzeko aukera izango dute, kresalaren usaina eta olatu bitsen artean. Ekimena lau larunbatetan burutuko da Donostia eta Ondarroa lotzen dituen GR-121 ibilbidean zehar eta parte hartzeko beharrezkoa da aldez aurretik izena ematea Zelaieta Zentroan.

Lehenengo ibilaldia bihar izango da eta Donostian abiatuta Orion amaituko da. Gipuzkoako hiriburutik irtenda ibiltariek mendebalderanzko norabidea hartu eta 15 kilometroko bideari ekingo diote, Igeldo zeharkatu eta txalet, landa eta baserri artetik pasatuz.

Zailtasun gogorreneko etapa urriaren 24an egingo den bigarrena izango da. Orion hasi eta Getariako txakolina izendapena daukaten mahasti artean igaroko den ibilbideak 16 kilometro ditu. Zarautzek eskaintzen dituen bistak aprobetxatuz Zumaiarantz hurreratuko dira txangoa bukatzeko.

Zumaia eta Deba bitarteko 14,5 kilometroko ibilbidea azaroaren 7an burutuko da. Zumaia atzean utzita, bertako flysh ikusgarria miretsi ondoren, bakardadez blaitutako kala artean ibiliko dira, itsasoko haize fina sentituz. Amildegi ikusgarriak eta landa eta baso galduak ikusteko aukera izango dute Debara heldu baino lehen.

Azkenengo ibilaldia Bizkaiaratz hurbilduko ditu partaideak 10 kilometroko bidea egin eta gero. Deban hasi eta landa eta baso berdeak zeharkatu ondoren Ondarrun bukatuko da Gipuzkoako kostaldea ezagutzeko aukera emango dituzten txangoak.

Irteera guztiak goizeko 8.00etan hasiko dira Gudari kaleko autobus geltokitik. Parte hartze nahi dutenek izena eman behar dute aldea aurretik Zelaieta zentroko erregistroan eta ibilaldi bat edo bi egitea nahi dutenek 7 euro ordaindu beharko dituzte eta 3 edo 4 txangotara joan nahi dutenentzako prezioa 12 eurokoa izango da.