Gallandara frontalekin igoko dira zapatuan Zaldaik antolatutako Iurretako Mendi Astean

Iurretako Zaldai Mendi Taldeak antolatutako V. Mendi Astea ospatuko dute bihartik domekara bitartean. Mendia eta naturaren inguruko hitzaldiez gain, bestelako ekitaldiak  tartekatuko dira egitarauan.

Mendia herrira hurbiltzeko asmoa duen ekimena bihar hasiko da, 19:00etan Goiuria Kultur Gunean, ‘Aizkorriko kanalak’ izenburuarekin Xabi Mujika ‘Smity’k emango duen hitzaldiarekin. Hurrengo egunean, leku eta ordu berean, ‘Pamir, distantziak’ izenburua duen dokumentala eta hitzaldia egongo da Joseba Iztueta Dorronsororen eskutik.

2021eko Zaldai Mendi Erronka ekimenaren sari emate ekitaldia, barikuan egingo da, 19:00etan hasita, Askondoko aterpean.

Bizikletak hartuko du zapatu goizeko protagonismoa, 10:00etan hasiko baita Askondoko aterpean Basatzan-Angelman Iurretako IV. Mendi Bizikleta Martxa. Prestatutako ibilbideak 25 kilometro inguruko luzera eta 1000 metroko gainbehera positiboa du.

Proban parte hartzeko beharrezkoa da www.kirolprobak.com webgunean izena eman eta 7 euro ordaintzea, edo egunean bertan apuntatzen denak 10 euro ordaindu beharko ditu. Biltzen den diru guztia Angelman sindromearen elkartearentzat izango da.

Iluntzeko 18:00etan berriz, ‘Gallandara frontalekin’ ekimena abiatuko da Askondo aterpetik. Ibilbidea “umeekin egiteko moduko da” eta txikienen “ibilbide erdian batzeko aukera izango dute Lukuarrietatik hasita” antolatzaileen esanetan.

2022ko Mendi Astea domekan amaituko da, 2021ean Etxepare Saria eskuratu zuen Amaia Egidazuk umeentzat eskainiko duen ipuin kontaketarekin. Askondoko aterpean ekitaldia 12:00etan hasiko da.

Urtarrilaren 26 edo 27ko hitzaldietara, Gallandara frontalekin egingo den irteerara edo umeentzako ipuin kontalarira gerturatzeko asmoa dutenek, aldez aurretik izena ematea eskertuko dute antolatzaileek.