Euskaraz bizi nahi dut ekimenaren aldeko lasterketa egingo dute Berrizen

Berrizko Udalak, Berrizko Euskararen Aholku Batzordeak eta Kontseiluak ‘Euskaraz bizi nahi dut’ herri-lasterketa antolatu dute datorren iganderako, urriak 5. Ekimen honekin “Berrizen ere, euskaraz bizitzeko nahia adierazteko aukera” izango dela azpimarratu dute antolatzaileek.

Lasterketa hasi aurretik, 10.45etik 11.15ak arte, lasterketarako doako izen-ematea eta kamiseta salmenta izango da Olakueta plazan eta ondoren partaide guztiak abiatuko dira Berrizburura trikitilariek alaitutako kalejiran. 11.30eta Berrizburun hasi eta plazan bukatuko den lasterketa hasiko da eta 12.00an aldera luntxa eta izena eman duten artean oparien zozketa egingo da.

Berrizko lasterketa ‘Euskaraz bizi nahi dut’ dinamikaren baitan dago eta irailean eta urrian zehar Euskal Herriko hainbat herritan herri-lasterketak antolatu dira Kontseiluarekin batera. Ekimen honekin “Euskaltzaleok euskaraz bizitzeko helburua edo nahi sendoa” dugula aldarrikatzen da.

Gainera, “euskaltzale guztiok aldi berean eta norabide berean eragiten badugu, alegia, euskaraz bizitzeko baldintzak sortzeko, seguru gaude aldaketa sakonak eragin eta euskaraz bizi ahal izatea posible egingo dugula”, baieztatzen dute ‘Euskaraz bizi nahi dut’ manifestuan.