Elorrioko Udalak San Juan eta Elizalde kaleetako intersekzioa berrantolatzeko lanak hasi ditu

Elorrioko Udalak San Juan eta Elizalde kaleen intersekzioa berrantolatzeko lanak hasi ditu dagoeneko, eta bost asteko epean amaituta egotea aurreikusten du. Lanak gauzatzeko 69.095 euroko inbertituko ditu.

Egitasmoak, “aurrez identifikatutako hainbat arazori konponbideak emateko estrategiak” garatzeko aukera emango du, Gobernu Taldeko kideen esanetan.  Orain arte, espaloiak “ez zuen behar adinako zabalerarik –ezta zoladurarik ere–, eta San Juan kaletik igarotzen ziren ibilgailuek ikuspen gutxi zuten kale hori zeharkatzen zuten oinezkoekiko.

Elizalde kaleko 2 zenbakian berriz, espaloi iritsezin bat zegoen, eta futbol zelaira arteko oinezkoentzako bidea asfaltoan margotuta egon da, espaloirik gabe. Elkargunean, gainera, ibilgailu asko egon izan dira aparkatuta eta horrek oinezkoei errepidearekiko duten ikusmena eta irismena murriztu izan die.

Azkenik, “San Juan kaleko oinezkoentzako pasabidearen ondoan, pododaktil batzuk egon dira gurutzatzeko biderik egon ez arren, eta horrek nahasmena sortzeko arriskua zuen ikusmen arazoak dituzten pertsonen artean”.

Espaloi irisgarriak

Lanak amaitzen direnean “espaloi irisgarriak egingo dira, oinezkoentzako azalera handiagoa jarri, asfaltatze inprimatuko goi-ordokia ipini, oinezkoentzako pasabideak egin, saneamendu-sareak hobetu eta trafiko-seinale berriak jarri. Funtsean, oinezkoei eta bizikletan doazenei emango zaie lehentasuna”.

Bidegurutze hori hobetzea izan zen 2022ko aurrekontu parte-hartzaileen prozesuan boto gehien jaso zituen proposamena, emandako 277 bozketatik 45 herritarrek horren alde egin baitzuten.