EAJk balioan jarri ditu Aldundiak lehen sektorean belaunaldi erreleboa bermatzeko bultzatutako ekimenak

Durangaldeko EAJ-PNVk balioan jarri ditu Bizkaiko Foru Aldundiak lehen sektorean belaunaldi-erreleboa indartzeko aurkeztu dituen neurriak, Eskualdeko nekazaritza eta abeltzaintza ustiategien etorkizuna bermatzeko gai estrategikoa baita.

EAJ-PNVk arreta berezia jarri du Foru Aldundiak berriki iragarritako bi ekimenetan. Batetik, Urkiolako Landa Garapenerako Elkarteak sustatutako Haztegiari ematen jarraitzen dion babesean. Gune horrek lehen sektorean lehen urratsak eman nahi dituztenei prestatzeko, esperientzia eskuratzeko eta beren proiektu propioa garatzeko aukera eskaintzen die, profesionalen laguntzarekin.

Bestetik, pozik agertu da Durangaldean belaunaldi-erreleboari lotutako tresnak eta baliabideak sektorera hurbiltzeko antolatutako eskualdeko topaketetako bat egingo delako. Jardunaldi horrek nekazaritza-ustiategien transmisioari buruzko informazioa partekatzeko eta jarduera honetan hasi nahi dutenentzako dauden aukerak ezagutarazteko balioko du.

“Lehen sektorearen etorkizuna gero eta pertsona gehiagok bertan bizi eta lan egiteko aukera bat aurkitzeko beharrezko baldintzak sortzean datza”, adierazi dute Durangaldeko EAJ-PNVtik. “Horregatik dira hain garrantzitsuak laguntza ekonomikoa, aholkularitza eta gertuko laguntza uztartzen dituzten ekimenak”.

Etorkizunean inbertitzea

Alderdi jeltzaleak gogorarazi du nekazaritza-sektoreak funtsezko zeregina duela landa-ingurunearen mantentzean, gertuko elikagaien ekoizpenean eta eskualdeko paisaiaren kontserbazioan. Ildo horretan, belaunaldi-erreleboa erraztea Durangaldearen eta bertako herrien etorkizunean inbertitzea ere badela uste dute.

EAJ-PNVren iritziz, bereziki positiboa da Foru Aldundiak bultzatutako neurriak zuzenean eskualdeetara eta sektorean lanean ari diren edo jarduera honetan hasi nahi duten pertsonengana hurbiltzea; izan ere, horrela Bizkaiko  urralde orekarako eta landa-garapenerako estrategikoa den sektore bat indartzen da