Durango euskal kulturaren erdigunea izango DA bost egunez

Literatura eta musikarekin batera ikus-entzunezkoak, arte eszenikoak, teknologia berriak zein euskal kulturaren transmisioan eragin nahi duen Durangoko Azokak 53. edizioari emango dio hasiera gaur. Bost egunez, Landako gunea ardatz duen ekimena Durangora zein Euskal Herria osora hedatuko den hitzordua bilakatuko da.

‘DA! Asko dira’ goiburua izango duen edizioak eskaintza paregabea eskainiko die kultura zaleei, gune desberdinetarako prestatutako egitarauan 200 kultur ekitalditik gora iragartzen baitira. Landakon kokatuko diren 247 erakusleihoetan berriz, 304 liburu, 93 disko eta 18 aldizkari berri egongo dira eskuragai; 439 nobedade guztira.

Ikasle Eguna

Ohikoa denez, Ikasle Egunak emango dio hasiera aurtengo edizioari ere eta Euskal Herriko bazter guztietatik gerturatutako milaka eskola-umeek izango dute lehenengo orduetako protagonismoa. Gainera, ikasleak izango dira Azokaren ateak irekiko dituztenak.

53. DAri hasiera eman ondoren, “ikasleek disziplina ezberdinetako tailerretan parte hartuko dute: ’Poropopoesia’ Saguganbaran, ‘Liburu bat egingo dut’ Areto Nagusian, ‘Heldu programazioari’ Kabi@n, ‘Euskal kantagintza kontzertuan’ Plateruenan Luhartz musika taldearekin, ‘Musika elektronikoaren ekoizpena’ Ahotsenea zuzenekoetan, ‘Gaur egungo testuak’ Ahotsenea solasaldietan, ‘Antzokia zirrikituz zirrikutu’ Szenatokian Karrika Antzerki Taldearen eskutik edo ‘Soinu efektuak zinemagintzan’ Irudienean”, antolatzaileek adierazi dutenez. Horrez gain, Durangoko Historia eta Arte Museoan ‘Grabatuarekin jolastuz, ilustratu’ tailerra eskainiko du Irati Egurenek.

‘Gu, Laboa’

Ikasleek ez ezik, adin guztietako publikokoak izango du gerturatzeko aukera DAk eskaintzen dituen zazpi guneetara eta egun osoan  hainbat jarduera egongo da adin ezberdineko bisitariei zuzenduta.

53. edizioaren inaugurazio ekitaldia arratsaldeko 19:00etan izango da Areto Nagusian bertan erakunde publikoetako ordezkariak parte hartuko dutela. Agintarien hitzaldiez gain, aurtengo kartela egin duten Txakur Gorria sormen kolektiboko kideek ‘Digara’ ikuskizun laburra eskainiko dute.

Lehenengo egunerako prestatutako egitarauak proposamen erakargarriak iragartzen ditu, eta erakargarrienetarikoak aipatzearren, 19:00etan Irudienean eskainiko den Mikel Laboaren inguruko ‘Gu, Laboa’ dokumentala, bere heriotzaren 10. urteurrena dela eta; Ahotsenean, 13:40an Broken Brothers Bras Bandek aurkeztuko duen ‘Txertaketa’ disko berriaren zuzeneko ekitaldia edo Plateruenan 23:00etan hasita Huntza taldeak ‘Xilema’ diskoa aurkezteko eskainiko duen kontzertua.