Durangaldeko dantzen agerraldia antolatu dute

Bigarren urtez jarraian Durangaldeko dantzen agerraldia antolatu du Gerediaga Elkarteak. Ekitaldia bihar ospatuko da Ezkurdin eta agerraldiak eskualdeko dantzak zabaltzea dauka helburu nagusi. Izan ere, dantza eta kantu inguruko folklore aberatsa gorde du mendeetan zehar Durangaldeak

Durangaldeko dantzen agerraldiak ???oraindik jende askok ezagutzen ez dituen eskualdeko dantzak zabaltzea dauka helburu nagusi???. Horrez gain, Durangaldeko dantzariak jai giroan batzeko aitzakia ere bihurtu da, azaldu dute Gerediaga Elkartetik.

Ekitaldia bihar hasiko da arratsaldeko 19.00etan kalejira batekin. Durangoko udaletxe aurrean irten eta Santa Ana plaza, Goienkale eta Andra Mari kaletik behera Ezkurdiraino joango dira ilaran taldeak. Dantzen agerraldia, berriz, arratsaldeko 19:30ean izango da bertan. Euria izanez gero, ekitaldia merkatu plazan ospatuko da.

Agintariena, banangoa, makil jokoa, Garaiko Gernikako arbola, arku dantza, zintza dantza, txotxongilo eta nesken soka dantza dantzatuko dira agerraldian. Halaber, ekitaldiaren amaieran baserriko oilaskoa dastatzeko aukera egongo da.

Gerediagak azaltzen duen bezala, dantza eta kantu inguruko folklore aberatsa gorde du mendeetan zehar Durangaldeak. Horren adierazpen nagusi dira, esaterako, oraindik herri batzuetan eta agintarien aurrean egiten diren dantzak.

Horiekin batera, bestelako ohiturak ere gorde izan dira. Adibidez, Garaiko herrian, dantzari eta herritarrak prozesioan joaten dira  eta Santiagoren irudiaren ohorez ???Gernikako arbola??? dantza egiten dute. Elorrion, berriz, Errosarioko Ama Birjinaren aurrean errebonbiloekin prozesioa eta arma alardea egiten da. Iurretan, ordea, oraindik mantentzen dute gorulari estanpa, 1886ko Durangoko Euskal Jaietarako Valentin Zubiaurre maisuak berreskuratu zuena.

 DURANGON. Durangoko albisteak