Bildu eta Aralarreko zinegotziek baraualdia egingo dute presoen eskubideen alde

Durangoko Udaleko Bildu eta Aralarreko zortzi hautetsiek baraualdia egingo dute datorren abenduaren 16an euskal presoen eskubideen alde. Atzo goizean emandako prentsaurrekoan aurreratu zutenez, datorren urtarrilaren 7an, euskal presoen alde Bilbon burutuko den manfestaldiarekin bat egin eta Durangoko eragile guztiei deialdia luzatu zieten.

Dani Maeztu Aralarreko bozeramaleak eta Urdaspal Bolinaga Bildukoak azaldu zutenez, baraualdiarekin batera, kontzentrazioa burutuko dute egun horretan goizeko 12.00etan, aste horretako mobilizazioei amaiera emateko. Izan ere, abenduaren 12tik 16ra Durangoko eragile sozial ezberdinek “mobilizazioak burutzeko konpromisoa” hartu dutela aurreratu zuten zinegotziek.

Mobilizazioen harira, ekimenaren bultzatzaileek gogoratzen dutenez, datorren abenduaren 30ean eta arratsaldeko 20.00etan, manifestazioa egingo da Andra Maritik hasita, euskal presoak herriratzearren alde.

Atzo goizean eman zuten prentsaurrekoan, “bizi dugun aukera historiko honen aurrean”, presoen eskubideen errespetua eskatu zuten. Hala nola, dispertsioaren amaiera eta preso guztien Euskal Herriratzea, gaixotasun larriak dituzten presoen askatzea eta zigorra beteta dutenen askatzea, besteak beste.

Izan ere, “konponbide politikoan, presoek ere parte izan behar dute, ziklo bat behin betikoz itxi eta etorkizunean  aske egingo gaituen ziklo berria indarrez irekitzeko”.

DURANGON. Durangoko albisteak