‘Biblioteka+’, zornotzarrak irakurketan murgiltzeko egitasmo zabala

Adin guztietako erabiltzaileentzako kultura eta literatura jarduerak eskaintzeko helburuarekin, Amorebieta-Etxanoko Udal Liburutegiak “Biblioteka+” egitasmoa antolatu du. Ekainera bitartean iraungo duen programazioak, umeentzako eta nagusientzako ipuin-kontalarien saioak, solasaldi-hitzaldiak, “Irakurlearen Txokoa”, on line egiten den literatura kritikaren tailerra eta literatura bidaia eskainiko ditu besteak beste.

“Zornotzarrak era ludikoan, hurbilean eta entretenigarrian irakurketan, literaturan eta idazketan murgiltzea da proiektuaren helburua”, aurreratu du Andoni Agirrebeitiak, Kultura zinegotziak egitarauaren aurkezpenean.

Solasaldi-hitzaldiekin hasteko eta “Begiradak”  izenpean,  “50 sombras de Grey” trilogiak eragindako literatura-uhinaren inguruan, Skolastika taldeko Josune Muñozen eskutik abiatuko da. Literatura-topaketetan, berriz, Toti Martinez de Lezea eta Itsaso Martín  idazleak izango dira. Amaitzeko, Dolores Redondok idatzi duen ‘El Guardián Invisible’ lanarekin lotuta Baztanera literatura bidaia egitea espero dute ekainean. Urrian helduko zaio berriro ere programari, mikronarrazioen lehiaketa-tailerra orduko lehenengo ekimena izanik.

Honetaz gain, osteguneroko proposamena egiten du liburutegiak, “Irakurlearen Txokoa” egitasmoarekin. Udalerriko kultura-programazioan  irakurketan interesaturik dauden pertsonen topagunea da. “Astero elkartzen dira, dinamizatzailea ere tartean, kulturarekin lotutako hainbat gairen inguruko iritziak elkarri adierazteko, asteburuko filmaren gidoitik hasi, eta irakurritako azken eleberriraino, kontzertuak, antzezlanak, erakusketak, eta abar alde batera utzi gabe”, azaldu du Sabin Etxebarriak Liburutegitik.

“Pertsonen topagunea”

Bestalde, on line egiten den literatura kritikaren tailerra da irakurketaren alorreko beste proposamenetako bat. Liburutegiko arduradunak esan duenez, sei hilabetean, sei libururen inguruko literatur kritika egin behar dituzte partaideek. Interneteko plataforma batera bidaltzen dira lanak, zuzenduak izan daitezen. Plataforma bermedun horretan harremanetan daude etengabe taldekideak, bai beraien artean, eta bai lanen zuzentzaile den adituarekin. Taldeak bilera egiten du hilero, irakurketen komentarioak egiteko, lanak sorrarazitako zailtasunez jarduteko eta egileek beren lanetan agertzen dituzten gaietan sakontzeko.

Bestalde, ipad bi eta lau e-reader jarriko dira eskuragarri izango dira liburutegiko erabiltzaileentzat. “Liburuak egoteaz gain, pertsonen topagunea da liburutegia”, azpimarratu du Etxebarriak.

ZORNOTZAN. Amorebieta-Etxanoko albisteak