Baserritar eta kaletarren bidegurutzearen atarian

Euskal Herriko erdigunea bilakatuko da Abadiñoko Zelaieta otsailaren 3an, San Blas eguna dela eta. Ehunka lagun gerturatuko da bertara inguruko eta hain gertu ez diren herri eta hirietatik. Bertan baserritarrek, abeltzainek eta artisauek gerturatutako ortuariak, abelburuak eta eskuz egindako jaki edo eskulanak izango dira ikusgai. Eta, nahi edo ahal izanez gero, begiz jotakoa erosteko ere.

Abadiñoko Udalak BBKren babesarekin antolatutako “Euskadiko nekazaritza eta abeltzaintza azoka handienean”, batez beste 200 bat abelburu eta 170 bat saltoki kokatuko dira antolatzaileen esanetan. Jose Luis Navarro alkatearen esanetan “teknologiaz jositako gizarte honetan badirudi lehen sektoreko lanbideak ahaztuta daudela, baina funtsean beti izango dira hor, eurek baitira familia askoren bizibidea ez eze, gizartearen elikadura osasuntsuaren oinarria ere”.

Abelburuen gunea trinkete ostean egongo da; artisauko 32 saltokiak Txanporta plazan jarriko dira; landare eta hazien postuak trinketeko aparkalekuan izango dira; Gaztañodi, Iturritxo eta Aita Aureliano Letona kaleetan eta Txanporta plazan egongo dira baserriko makinen saltokiak, burdingaienak eta zurezko produktuenak eta Ferialekuan eta Trinkete ondoan zazpi txosna eta talo saltegi egongo dira. Erroskila saltokik berriz San Trokaz eta Txanporta plazetan, Zeletabe kalean eta Ferialekuan.

Goizean goiz hasiko dira erakusketarien eta bisitarien joan-etorriak eta 9.00etarako azokan barrena ibiliko da Txanbolin txistulari taldea. Antzinatik ospatzen den feria arrakastatsua bada eguneko ardatz nagusia, beste hainbat ekitaldirekin osatuko da egitaraua.

Txaber Altube, Xabier Amuriza eta Eneko Abasolo ‘Abarkas’ bertsolarien saioa izango da eguerdian eta ondoren Bihurri, Olasagasti, Larretxea eta Mendieta aizkolarien eta Joseba Ostolaza eta Idoia Etxeberria harri-jasotzaileen ekitaldia hasiko da. Arratsaldean eta gauean idi-probak izango dira eta Lotxo taldeak gauean joko duen erromeriarekin osatuko da eguna.

Kirolak eta burduntzi txapelketa

Kirol egitarau oparoa ere izango da San Blas jaietan. Tornosolo trinketean San Blas 2015 Pilota Txapelketako norgehiagokak jokatuko dira gaur, bihar eta otsailaren 1ean, 3an eta 6an, azken egun horretan finalak jokatuko direlarik. Idi proba saioak berriz, otsailaren 6an, 7an, 8an eta 9an izango dira.

Jai egitarauak amaiera ezin hobea izango du otsailaren 14an izango den XXVII. burduntziko bildots txapelketarekin. Goizeko hamarretan hasiko den lehiaketarekin batera, txakoli erakusketa izango da eta eguerdian bildots bazkaria izango da.