Atxondoko Udalak ikusgai jarri du herri-bideen inbentarioa

Atxondoko Udalak herriko hiru elizateetan jarri du ikusgai herri-bideen inbentarioaren zirriborroa. Egindako ikerketari buruzko azalpen zehatzagoak nahi dituzten herritarrek berriz, lana burutu duen Sendo enpresako teknikariekin biltzeko aukera izango dute eta horretarako hitzordua adostu beharko da.

Atxondoko Udalak eskatutako herri-inbentarioaren zirriborroa amaitu berri du Sendo enpresak eta egindako azterketaren emaitza herritar guztiek izango dute ikusgai gaurtik aurrera. Horretarako, “herriko bideak batzen dituen planoa eta bide bakoitzaren legenda jarriko dira ikusgai, Apatako Udaletxe ondoan eta Axpe eta Arrazolako elizpeetan”, David Cobos Atxondoko alkateak azaldu duenez.

Herri-bideei buruzko informazioa eta zehaztasunak jaso nahi dituzten jabe edo herritarrek, lana egin duten teknikariekin batzartzeko aukera izango dute, zalantzak uxatzeko edo ekarpenak, aldaketak edo zuzenketak egiteko. Horretarako, izena eman beharko dute Udaletxeko bulegoan abenduaren 11 orduko eta hitzorduak abenduaren 14tik 19ra bitarteko asterako emango dira, goizez zein arratsaldez.

Herritarrak egindako ekarpenen ondoren, Udalbatzak inbentarioaren hasierako onespena egin beharko du eta, ondoren, dokumentuarekin bat ez datozen herritarrek alegazioak aurkezteko aukera izango dute, onespena BAOn argitaratu ostean.

“Udalak beharrezkoa ikusten du behingoz inbentario bat izatea, sarritan arazo eta zalantzak egoten direlako herriko bide ezberdinen jabetza dela eta edo berauetatik igarotzeko eskubideen harira”, Cobosen esanetan.

Inbentarioa onartu ondoren herritar guztiek jakingo dute “zeintzuk diren bide publikoak eta nork duen zer bide mantendu eta konpontzeko ardura”, alkatearen esanetan.