Astelehena arte iraungo dute gaur Euban hasten diren jaiak

Asteburu honetan Zornotzako Euba auzoko jaiak ospatuko dira eta ekitaldiz betetako egitaraua antolatu dute. Gaur emango diete hasiera jaiei eta ospakizunak astelehena arte luzatuko dira.

Goizeko hamaiketan umeentzako puzgarriekin hasiera emango zaie jaiei. Iluntzean, zortzi eta erdietan, mus txapelketaren txanda izango da eta bertan parte hartzeko izena ematea 20 eurokoa izango da.

Umeentzako jolasekin hasiko dira ere, goizeko hamaiketan, zapatuko ekitaldiak. Eguerdian, 13.30ean, umeentzako bazkaria antolatu da eta nagusien otordua hiruretan izango da. Ondoren, Xaibor Dj-aren txanda izango da. Iluntzean, Labeleko Hanburgesak eta oilaskoa dastatzeko aukera egongo da eta gaueko 22.30tan, Xaibor Dj-aren erromeriarekin bukatuko da eguna.

Igandeko egitaraua eguerdiko hamabietako mezarekin hasiko da. Arratsaldean, 18.30ean, antzerki saioari hasiera emango zaio eta agerraldian “37 bentanea 38 pasilloa” antzezlana eskainiko du Zeanuriko antzerki taldeak.

Deabru beltzak

Ondoren, Iurretako dantzarien eskainaldia egongo da eta gaueko bederatzietan Deabru Beltzak taldearen ikus-entzunezko ikuskizuna hasiko da.

Astelehenean izango da jaien azken eguna eta ekitaldiak hamabietan hasiko dira auzoko hildako guztien aldeko mezarekin eta jarraian luntxa egongo da. Arratsaldeko seietan hirukoteen arteko briska txapelketari hasiera emango zaio. Arratsaldean zehar taloa urdai eta txorizoarekin dastatzeko aukera egongo da eta gero, jaiei amaiera emateko, txokolatea banatuko da.