Aparkatzeko 213 leku berri hirigunean, Zornotzako komertzioa indartzeko

Herriko komertzioa sustatzeko eta indartzeko asmoarekin, aparkatzeko 213 leku berri atonduko ditu Amorebieta-Etxanoko Udalak hirigunean. Hiru gune berri izango dira: Ixer aldeko aparkalekua, Nafarroa zentrokoa eta Betarraganen, hain zuzen ere.

Udalak merkatarien Dendariak elkartearekin lortutako akordioari esker, hiru parking berri egokituko dira, irailetik aurrera erabilgarri egon daitezen.

Lehenbiziko eremua Ixerko aparkalekua izango da, igandeetako azoka gauzatzen den tokian. Bertan 146 aparkaleku egokituko dira, txandakoak izango dira eta doakoa, Udaletik aurreratu dutenez. Bigarren parkinga Nafarroa zentrokoa izango da. 25 plazarekin, txandakoa eta debalde izango da hau ere.

Ordenantza arautzailea

Biak irailean jarriko dira martxan, eta horretarako dagokion ordenantza arautzailea onartu behar da. “Bertan zehaztuko dira aparkalekua erabiltzeko ordutegia eta txanden denbora tartea, besteak beste”, aurreratu dute udal ardunadunek.

Azkenik, Betarragane inguruan atonduko dute hirugarren aparkalekua, El Carmelo ikastetxearen eta Konbenio kalearen inguruetan. Parking honek 42 plaza izango ditu, egunaren 24 orduetan erabili ahalko da, eta dohanik izango da. Kassu honetan, azarotik erabilgarri izatea aurreikusten dute udal arduradunek.