‘Zornotzako ahotsak’ proiektuaren grabaketa berriak aurkeztuko dituzte

Amorebieta-Etxanoko euskarazko ondarea mantentzeko asmoarekin egindako azken grabaketen aurkezpena egingo da bihar, urriak 15, arratsaldeko 19.00etan Zelaieta zentroan. ‘Zornotzako ahotsak’ deituriko ekimena Euskal Herriko Ahotsak proiektuaren barne kokatzen da eta bere asmoa “ondare ordezkaezinaren galera” eragoztea da.

Ekimen honen asmoa “herrietako adineko jendea elkarrizketatu eta euren euskara eta bizipenak jaso, eta herritarren artean zabaldurik, ahozko ondarea eta herri hizkerak katalogatu eta hedatzea” da.

Zelaieta zentroan aurkeztuko den atal berrian herriko hogeita hamalau edadeko pertsonari egindako elkarrizketak eta bideoan egindako grabaketen berri emango da. Elkarrizketatuek kontatzen dituzte antzinako pasadizoak, ohiturak eta bizipenak, eskuragarri daude www.ahotsak.com/amorebieta-etxano web orrian, lehenago egindako beste elkarrizketa batzuekin batera.

Euskal Herriko Ahotsak “azken belaunaldietan euskarazko ahozko transmisioan geratutako kolapsoari” aurre egiteko asmoarekin sortu zuen Badihardugu elkarteak 2003an. Sustatzaileen esanetan “eragin izugarria jasan dute hala ondare tradizionalaren transmisioak (tradizioak, erritoak, usadiozko lanbideak, etab.) nola azpi-euskalkien biziraupenak.

Azken 50 urteotan euskara estandarra edo batua nagusituz joan den neurrian, hainbat izan dira galtzeko zorian gertatu diren euskal hizkuntzaren eta kulturaren ondare-elementuak”.

‘Zornotzako ahotsak’ Badihardugu elkarteak eta Amorebieta-Etxanoko Udalak izenpetutako lankidetza-hitzarmenaren emaitza da.