Goitibera jaitsiera San Faustoetan

Aspaldi galdutako ohitura bat berreskuratuko da Durangoko San Fausto jaietan, hainbat urteko etenaldiaren ondoren goitibera jaitsiera egingo baita urriaren 15ean. Ekimena Euskal Herriko Inertzia Kirolen Federazioarekin elkarlanean antolatuta dago.

Parte hartzeko beharrezkoa da izena ematea urriaren 12ra arte https://ehikf.eus webgunean. Informazio gehiago jaso edota zalantzak argitzeko, Durangoko Udaleko agenda@durango.eus helbide elektronikora edo 630 81 52 43 whatsapp zenbakira idatzi daiteke.

Urriaren 15ean egingo den jaitsieraren ibilbideak 500 metroko luzeera izango du, eta irteera Eguzkitza auzoan (Okarantza baserriaren parean) eta bukaera Tabiran (Intxaurrondo kalean) izango da. Lasterketak kategoria ezberdinak izango ditu: Neumatika, Arinak, Drift Bike eta Errodamentuzkoak. Kategoria bakoitzeko adibideak www.ehikf.eus web orrialdean daude erakusgai, baita arautegia ere. Egun berean goizeko hamaiketan umeei zuzendutako goitibera tailerra egongo da Intxaurrondo kalean.

Ekimena dela eta, urriaren 14an eta 15ean, Intxaurrondo kaleko 6, 8 eta 10 zenbakietako eta Arriluzea kalean dauden  biribilgune bien arteko aparkalekuak kenduko dira, partehartzaile eta ikusleen segurtasuna bermatzeko.