Zelaietan erabakiko dira Bizkaiko Bertsolari Txapelketako finalistak

Abenduaren 20an Bilbao Arenan jokatuko den finalean kantatuko duten bertsolariak Amorebieta-Etxanon erabakiko dira. Gaur, arratsaldeko 17.30etan, Zelaieta Zentroan dagoen Amorebieta IV.a frontoian jokatuko da Bizkaiko Bertsolari Txapelketako hirugarren eta azken finalaurrekoa. Sarrerak bertsosarrerak.eu webgunean erosi daitezke.

Finalaurrekoan Arkaitz Estiballes, Garikoitz Sarriugarte, Ibon Ajuriagojeaskoa, Imanol Uria, Jone Uria eta Oihana Bartra lehiatuko dira. Orain arte, Iratxe Ibarra eta Etxahun Lekue daude finalerako sailkatuta, Etxebarriko eta Urdulizko saioak irabazi eta gero. Amorebieta-Etxanoko saioko irabazlea zuzenean sailkatuko da finalera, eta Bilbon lehiatuko diren beste bosteeñk, puntuazioen arabera edukiko dute sailkatzeko aukera.

Domekan kantatuko duten bertsolarietatik Arkaitz Estiballes eta Jone Uria 2012ko finalista izateagatik zuzenean egon dira finalaurrekoetarako fasera sailkatuta. Beraz, domekan hasiko da eurentzako Bizkaiko Txapelketa. Bestetik, Oihana Bartra Gautegiz-Arteagako kanporaketa irabazita sailkatu zen Amorebieta-Etxanoko saiora eta Imanol Uria Zeanurikoan. Ibon Ajuriagojeaskoa eta Garikoitz Sarriugarte berriz, puntuazioz lortu zuten finalaurrekoetarako txartela.

Maite Berriozabal, emaile beharretan

Amorebieta-Etxanoko saioan Maite Berriozabal ariko da gai emaile beharretan. Epaimahaian, Iñaki Aurrekoetxea, Mirari Azula, Jurgi Fuentes, Jon Jaio, Joseba Santxo eta Ander Txakartegi egongo dira, eta idazkari lanetan, Itziar Basterretxea ariko da.

Bertsolariek egin beharreko lanak hurrengokoak izango dira: alde batetik, zortziko nagusian ofiziotan hiruna bertso, zortziko txikian ofiziotan hiruna bertso eta hamarreko txikian ofiziotan hiruna bertso. Eta bestetik, kartzelako lana, puntua emanda bertso bi zortziko txikian eta gai bati buruz bertso bi doinu eta neurri librean