Umeen lasterketak eta eskolen arteko topaketak egongo dira domekako Bizikleta Egunean

Duranguesa Txirrindulari Elkarteak eta Durangoko Bizikleta Eskolak antolatutako Bizikleta Eguna ospatuko da datorren domekan, hilak 30. Egitarauan umeentzako lasterketa herrikoiak, Bizkaiko txirrindulari eskolen arteko topaketa eta gimkana probak tartekatuko dira.

Eguneko egitaraua umeen arteko txirrundulari lasterketa herrikoiekin hasiko da eta bertan parte hartzeko beharrezkoa da izena ematea goizeko 9:30etatik 10:00ak bitartera Ezkurdi plazan.

Lasterketak 1,3 kilometroko luzera duen eta trafikoari itxita egongo den zirkuituan egingo dira. Ibilbideak Fray Juan de Zumarraga, Laubideta eta Galtzareta kaleak eta Pinondo zeharkatuko ditu.

Lehen lasterketa, goizeko 10:30ean hasiko da eta irteera puntuan egongo diren 6 eta 10 urte bitarteko txirrindulariek bi itzuli eman behar dizkiote zirkuituari. Ondoren, 11 eta 14 urte bitarteko txirrindularien txanda izango da eta hauek lau itzuli emango dizkiote zirkuituari.

Parte hartzeko edozein motatako bizikleta erabili dezakete txirrindulariek, mtb, bidekoa, eta abar, eta kaskoa janztea derrigorrezkoa izango da.

Lasterketa herrikoiak amaitu ondoren, Bizkaiko txirrindulari eskolei zuzendutako proba hasiko da eta antolatzaileek 200 parte hartzaile inguru espero dituzte.

Eguneko egitaraua Bizkaiko gimkana challengerako puntuagarria den probarekin osatuko da. Infantil mailara mugatuta dagoen lehiaketa Ezkurdi plazan jokatuko da.