Traña-Matienako aparkalekuen arazoa bere osotasunean landu behar dela dio EH Bilduk

Abadiñoko EH Bilduk, Udalak Traña-Matienan jarriko duen doako OTA sistema “begi onez” ikusten badu ere, neurri horrekin udal gobernua “esperimentu edo abentura batetan sartzera doala” kritikatu du. Talde abertzalearen esanetan, hartutako erabakiak “ez du inon oinarritutako informe objektibo baten” euskarria.

EH Bildu “jakitun da” Abadiñoko auzoan aparkalekuen urritasunak eragiten duen arazoaz, baina egoera konpontzeko beharrezkoa ikusten dute Mugikortasunerako Plan Estrategiko bat aldez aurretik lantzea. Egitasmo hori egitea “aurreko legegintzaldian proposatu genion udal gobernuari” baina Udalak “neurri isolatu bat” hartu du, Trañabarren kalean TAO zerbitzua jartzea, hain zuzen.  

Aparkalekuen errotazioa ahalbideratuko duen sistema bat jartzeak Trañabarren kalean “hainbat aparkaleku hutsik egotea” ekarriko badu ere, erabaki horrek “beste kale batzuk duten berezko aparkaleku saturazioa handitzea ekarriko du” EH Bildukoen arabera.

Traña-Matienak duen aparkalekuen defizita 2014an Abadiñoko Udalak aurkeztutako txosten batean adierazten da. Gainera, “José Luis Navarro alkateak eta EAJko bozeramaile Eneko Etxebarriak, aitortu dute badakitela TAO sistema jartzeak beste zonalde batzuetan dagoen arazoa areagotu dezakeela. Hala ere, oraindik ez dute inolako irtenbiderik aurkeztu egoera hori ekiditeko” Abadiñoko EH Bilduren esanetan.