Argazkia: Euskaraldia Zornotza.

Maiatzean ospatuko den Euskaraldiaren jardueren baitan, Amorebieta-Etxanoko Udalak euskarazko ipuin laburren lehiaketaren edizio berria jarri du martxan. Ekimen honen helburua da herritarren artean euskararen erabilera eta sormen literarioa sustatzea, eta horretarako, parte hartzeko bi kategoria egongo dira; 16 eta 22 urte bitarteko gazteentzat bata eta 23 urtetik gorako herritarrei zuzendurikoa bestea.

Ipuinak euskaraz idatzi beharko dira, euskara batuan edo bizkaieraz, eta originalak eta argitaratu gabeak izan beharko dute. Gainera, ezinbestekoa izango da aurtengo Euskaraldiaren leloari, ‘Elkar mugituz egingo dugu’, erreferentzia egitea. Ipuinek gehienez 3.000 karaktere izango dituzte, zuriuneak eta izenburua barne.

Parte hartu nahi dutenek euskara@amorebieta.eus helbidera bidali beharko dituzte ipuinak, eta zein kategoriatan lehiatzen diren adierazi (A kategoria edo B kategoria). Ipuinarekin batera, izen-abizenak, telefono zenbakia, posta elektronikoa eta NANaren kopia bat erantsi beharko dira.

Lanak aurkezteko azken eguna maiatzaren 4a izango da.

Sariak eta ipuinen argitalpena

Kategoria bakoitzeko irabazleak epaimahai bitartez aukeratuko dira eta hauek 400 euroko saria jasoko dute. Horrez gain, saritutako ipuinak Hilero aldizkarian argitaratuko dira.

Bestalde, herritarrek ere izango dute ipuin irabazle gehigarri bat aukeratzeko aukera, maiatzaren 6tik 13ra egingo den bozketan. Bozketa herriko puntu ezberdinetan jarriko diren hautestontzien bidez egingo da. Bozketa bitartez hautatutako ipuinaren egileak Euskaraldiko produktuen sorta bat jasoko du. Era berean, bozketan parte hartzen duten herritarren artean ere Euskaraldiko produktuak zozketatuko dira. Sariak maiatzaren 15ean banatuko dira, Euskaraldiaren hasiera ekitaldian.

Ekimen honekin, Amorebieta-Etxanoko Udalak euskararen sustapenarekiko konpromisoa berretsi nahi du eta herritarrak lehiaketan parte hartzera animatzen ditu.

La entrada Abian da Euskaraldiari loturiko ipuin lehiaketa se publicó primero en durangon.com.

Joan den ekainaren 16an Durangon ospatu zen Julene Azpeitia Lehiaketaren 41. edizioko sari banaketa, herrian garrantzi handia duen kultur ekitaldia. Zeremonia Plateruena Kultur Aterpean egin zen. Literatur lehiaketako epaimahaiak 240 lanen artean erabaki zuen.

Leire Vargas Nieto idazle eta bertsolari durangarrak gidatu zuen ekitaldia, eta lehiakideen talentua eta sormena nabarmendu zituen. Sariak tokiko ordezkari politikoek banatu zituzten, eta irabazleek kulturari eta arteei egindako ekarpena aitortu zuten.

Jarraian, kategoria bakoitzeko irabazleen izenak zehazten dira:

Ipuinen kategoria:

• Lehen Hezkuntza (5. eta 6. mailak): Kurutziaga Ikastolako Kira Loizate Etxearte, “Okindegien Misterioa” rekin.
• Bigarren Hezkuntza (1. eta 2. mailak): Uxue Astorkia Torres, Kurutziaga Ikastolakoa, “Itzaletik Gertu” taldearekin.
  • Akzesita: Kurutziaga Ikastolako Xane Iturriaga Lagoma, “Dena Gezurra Da”.
• Bigarren Hezkuntza (3. eta 4. mailak): Kurutziaga Ikastolako Nahia Agudo Almaraz, “Arrakasta, Konfiantzaren Truke” taldearekin.
• 17-18 urte: Jone Berrizbeitia Munitxa, Ibaizabal Ikastolakoa, “Iraultza” lanarekin.
• 18 urtetik gorakoak: Maitane Arizti Ugarteburu, “Emma Zen Sekulakoa, Emma Zen Itzela”.

Poesia kategoria:

• Lehen Hezkuntza (5. eta 6. mailak): Irati Areitio Cearreta, Zabalarra Ikastetxekoa, “Bizitzak Mila Kolore”.
• Bigarren Hezkuntza (1. eta 2. mailak): Naiare Axkoeta Beitia, Kurutziaga Ikastolakoa, “Klima Aldaketa” rekin.
• Bigarren Hezkuntza (3. eta 4. mailak): Lore Sanchez Onaindia, Kurutziaga Ikastolakoa, “Ispiluaren Aurreko Isla, Nor Da?”.
• 17-18 urte: Ane Falagán Muñoz, Fray Juan de Zumarraga Institutukoa, “Zeurea Ez Dena” lanarekin.
• 18 urtetik gorakoak: Jon Joseba Aizpurua Antia, “Biziraulen Ubera Goria”.

Bertsoak/Koplak kategoria:

• Lehen Hezkuntza (5. eta 6. mailak): Nikole Alvarez Alonso, Jesuitak Ikastetxekoa, “Benetako Berdintasuna” lanarekin.
• Bigarren Hezkuntza (1. eta 2. mailak): Aizpea Perez de Arenaza Garces, Kurutziaga Ikastolakoa, “Nire Ametsetako Bidaia” rekin.
  • Akzesita: Izaro Ardanza Herrero, San Antonio Ikastetxekoa, “Itxaropena” lanarekin.
• Bigarren Hezkuntza (3. eta 4. mailak): Ez zen saririk eman.
• 17-18 urte: Kelmene Abaitua Isazelaia, Jasone Martin Carballo eta Garazi Uriarte Alonso, Kurutziaga Ikastola eta Fray Juan de Zumarraga Ikastetxekoak, “17 Urte” lanarekin.
• 18 urtetik gorakoak: Iñigo Legorburu Arregi, “Lagunenkin Bai, Lagunenkin Ai!”.
  • Akzesita: Iruri Altzerreka Martinez, “Mait (Asuna) z”.
  • Akzesita: Urko Egaña Calderon, “Sehaskatik Ohera”.

Durangoko Udalak lehiakide guztien parte-hartzea eskertu du eta irabazleak zoriondu ditu egindako lanagatik. Ekitaldi hau herritarren talentu literario eta artistikoaren erakusgarri izan da, eta Durangok kultura eta arteak sustatzeko duen konpromisoa berresten du.

La entrada Julene Azpeitia lehiaketako sarituak se publicó primero en durangon.com.

Zaldibarko Udalak herriko jaiak iragarriko dituen kartelaren lehiaketa martxan ipini du. Lanak maiatzaren 19ra arte aurkeztu ahal izango dira eta egile bakoitzak lan bakarra aurkeztu ahal izango du.

Parte hartzea edonorentzat irekita dago eta kolera eta diseinuaren gaia norberaren aukerakoak izango dira. Hala ere, ‘2024ko Zaldibarko Jaiak’ esaldia agertu beharko da eta ez da irudi sexistarik ez eta testu sexistarik onartuko.

Diseinuak euskarri fisikoan edo digitalean aurkeztu daitezke. Lehen aukeran, DIN-A3 formatuan eta era bertikalean aurkeztu behar da eta gutunazal itxian entregatu beharko da udaletxeko bulegoetan, 2024ko Zaldibarko Jaiak lemapean eta egilearen adina zehaztuta. Barrualdean, beste gutunazal itxi batean, egilearen izen-abizenak, bizilekua eta helbidea zehaztu beharko dira.

Euskarri digitala aukeratzen duenak JPG formatua 72 ppp-ko bereizmenarekin eta 42×29,7 zentimetroko proportzioarekin (DIN-A3 neurria) aurkeztu beharko du. Kasu honetan, kultura@zaldibar.eus helbidera bidali beharko da, beti ere, maiatzaren 19ra arteko epemugarekin.

Kartel irabazleak 250 euroko saria eskuratuko du, eta bigarrenak berriz, 150 eurokoa. Hirugarren sari bat ere egongo da 14 urtetik beherako parte hartzaileentzat eta kasu honetan eskudirua beharrean, onuradunak 100 euroko saria jasoko du Zaldibarko ostalaritza eta merkataritza establezimenduetan erabiltzeko.

La entrada Zaldibarko Udalak 500 euro banatuko ditu herriko jaiak iragartzeko kartel lehiaketan se publicó primero en durangon.com.

DBH3 eta  DBH4 ikasten ari diren gazte berriztarrei eta horien gurasoei zuzendutako ‘Nahi dudalako!’ kanpainarekin bat egin du udalerriak, Bizkaiko beste 14 herrirekin eta 3 mankomunitaterekin batera. Ekimenaren helburu nagusia DBH euskaraz egin duten gazteek hortik aurrerako ikasketak ere euskaraz egitea da.

Erabaki hori hartzen laguntzeko, informazio zabala eskaintzen duen www.nahidudalako.eus webgunea da kanpainaren ardatza. Gune horretan “gazteek Batxilergoa zein Lanbide Heziketa euskaraz egiteko duten eskaintzaren berri zehatza jasoko dute”, adierazi dute Berrizko Udaletik.

Horrez gain, “Unibertsitateko eskaintza zein den ikusteko aukera ematen du webguneak eta horrekin batera, etorkizunera begira, izan ditzaketen hainbat zalantza argitzeko balioko die”.

Webgunean sartu eta bertan dagoen inkestan parte hartzen duten gazteek hainbat sari  irabazteko aukera izango dute; hola nola, iPad (8th generation) Wi-Fi, Homepod bozgoragailu inteligentea eta kultura eta kirol materiala erosteko 200 euroko opari txartela.

Hitzaldi sorta

Gune horretan eskaintzen den informazioaz gain, kanpainaren berri ematen duen diptikoa eta kanpainaren nondik  norakoak azaltzen dituen gutuna jaso dute etxean gazte eta guraso berriztarrek.

Horrekin batera gazteentzako hainbat hitzaldi ere antolatu dira. Saioetan, euskaraz ikastearen garrantzia nabarmendu eta www.nahidudalako.eus webgunean zer aurkituko duten azalduko zaie gazteei. Hitzaldiak, Xabi Hoo, Pello Reparaz, Egoitz Txurruka, Ane Guria eta Zuriñe Hidalgok emango dituzte eta solasaldietan hizkuntzak beraien bizimoduan izan duen garrantzia azaldu eta gazteak horren inguruan gogoeta egitera bultzatuko dituzte.

Alkarbidek, Bizkaiko euskara zerbitzuen bilguneak, koordinatu duen proiektu honetan, parte hartzen duten Durangaldeko udalerri bakarrak Berriz eta Elorrio dira. Gainontzekoak, Arrigorriaga, Basauri, Berango, Bilbo, Erandio, Etxebarri, Getxo, Muskiz, Ortuella, Portugalete, Santurtzi, Sestao, Zierbena eta Abanto-Zierbena udalerriak eta Enkarterriko, Txorierriko eta Uribe Kostako mankomunitateak dira.

La entrada Berriz ‘Nahi dudalako!’ kanpainara batu da, euskarazko ikasketak sustatzeko helburuarekin se publicó primero en durangon.com.

Urtero bezala, Zaldibarko Udalak jaietako kartel lehiaketa martxan jarri du. Irabazleak 250 euroko saria jasoko du eta bigarren kartel onena aurkezten duenak 150 eurokoa. Horretaz gain, 14 urte edo gutxiago dauzkatenen artean aukeratutako lan onenak 100 euroko balioa duen sari berezia jasoko du.

Lehiaketa nahi duen orori zuzenduta dago eta kartelak kartazal itxian eta ‘2019ko Zaldibarko Jaiak’ lemapean aurkeztu behar dira, azalean egilearen adina ere zehaztu behar da. Barruan, eta beste kartazal itxi batean, egilearen izen-abizenak, bizilekua eta helbidea jasoko dira. Egile bakoitzak ezin izango du lan bat baino gehiago aurkeztu.

Kartelak euskarri fisikoan aurkeztu ezkero, DIN A3 formatua izan beharko dute eta udaletxeko bulegoetan entregatu beharko dira. Euskarri digitalean aurkeztu nahi badira, aldiz, kultura@zaldibar.eus helbide elektronikora bidali behar dira. Lanak aurkezteko epea maiatzaren 28an, arratsaldeko 15:00etan bukatuko da.

Jai batzordeko partaideek osatuko duten epaimahaiak, maiatzaren 29an emango du ezagutzera bere erabakia eta saririk jaso ez duten lanak Udalak ikusgai jar ditzake jaietan zehar. Gaia norberaren aukerakoa izan arren, ez da irudi eta testu sexistarik onartuko.

La entrada Martxan da 500 euro saritan banatuko dituen Zaldibarko jaietako kartel lehiaketa se publicó primero en durangon.com.

Durangoko Gure Esku Dago ekimenak antolatutako tonbolaren zozketa egin zen domeka arratsaldean eta bertan zotz egindako 132 sariak dagoeneko zenbaki bati lotuta daude.

Euro baten truke saldutako txartel bakoitzarekin sekulako sariak lortzeko aukera zegoen. Zozketaren antolatzaileek, besteak beste, landetxeetan asteburuak, bainuetxe eta spa-guneetarako sarrerak, masajeak, etxetresna elektrikoak, dozenaka afari eta gosari, oparitan gastatzeko ehunka bale edo Athletic-eko jokalarien kamisetak irabazteko aukera ematen zuten.

Zenbaki sarituak ondoko argazkian agertzen dira eta sari bakoitzaren irabazleek Gure Esku Dagok Artekale 14an duen bulegotik pasa behar dira sariak jasotzeko, maiatzaren 10etik 14ra bitartean, arratsaldeko 19:00etatik 20:00etara.

La entrada Gure Esku Dago ekimenak tonbolaren 132 sariak zozkatu ditu se publicó primero en durangon.com.