Elorrioko erdiguneko tabernariek Erreka kaleko jaiak ospatuko dituzte gaurtik domekara bitartean. Prestatu duten egitarauan pilota partidak, Eixu Azoka eta Joselu Anayak zein Sambabadago musika taldeen agerraldiak nabarmentzen dira.

Ospakizunak gaur bertan hasiko dira arratsaldeko 19:00etatik aurrera egingo den pintxopotearekin eta tabernariek bezeroen artean zozketatuko dituzten bi otzara ederren banaketarekin.

Biharko egitaraua arratsaldeko 18:00etatik aurrera plazako frontoian jokatuko diren  pilota partidekin abiatuko da. Ordu erdi geroago Txaloka taldeak girotutako diskofesta egongo da.

Eixu Azoka

Zapatuan ere ordu berean hasiko diren pilota partidekin abiatuko dira ekitaldiak. Eguneko egitaraua 19:30ean hasita Joselu Anayak taldeak eskainiko duen musika ekitaldiarekin osatuko da.

Domeka goizean artisau eta sortzaileen Eixu Azoka egingo da Urarka kalean 10:30etik aurrera, eta goizean zehar Sambabadago musika taldearen agerraldia egongo da. Eguerdian, pilota partidak jokatuko dira plazako frontoian eta puzgarriak jarriko dira plazan.

La entrada Joselu Anayak taldeak zapatuan emango duen kontzertua Erreka kaleko jaietan nabarmenduko da se publicó primero en durangon.com.

Zaldibarko Udalak eta herriko kirol elkarteek ‘Kirola oinarritik euskaraz’ programa jarri dute abian “umeekin eta gaztetxoekin egiten diren jardueretan euskararen erabilera sustatzeko” helburuarekin, Udaletik adierazi dutenez.

Programak 350 gazteri baino gehiagori eragingo die, Zaldua Kirol Elkarteko futbol, pilota, saskibaloi eta mendia arloak, Biak bat Futbol Taldeak, Olazarmendi Gimnasia Erritmiko Taldeak eta Lagun-artea Txirrindulari Elkarteak egitasmoarekin bat egin baitute. Elkarte horietan guztietan euskararen egoerari buruzko diagnostikoa egin dute.

‘Kirola oinarritik euskaraz’ egitasmoak “Zaldibarko gazte guztiek edo gehienek euskaraz badakitela” hartzen du abiapuntu. Beraz, “ez litzateke eragozpenik egon beharko kirolean euskaraz jarduteko”.

Zaldibarko kirol elkarteak ere jabetu dira horretaz, eta “hainbat lan-saioren ostean, garbi ikusi dute urratsak egin behar direla euskararen erabilera indartzeko”. Hausnarketa horren ondorioz, “komunikazioetan euskara lehenestea; elkarteetan euskararen gaia kudeatzeko arduradunak izendatzea; hizkuntza irizpide batzuk zehaztea eta jarraipena egitea; eta entrenamenduen azterketa sakona egitea, euskaraz entrenatzeko eta euskararen erabilera handitzeko” ahaleginak egingo dituzte.

Egitasmoa aurrera eman eta euskara lehen lerroan jarri behar duten partaideak “kirol elkarteetako zuzendaritzako kideak, gurasoak, entrenatzaileak, eta, nola ez, ume eta gazteak” dira.

La entrada Zaldibarko Udalak euskararen erabilera sustatu nahi du kirola egiten duten gaztetxoen artean se publicó primero en durangon.com.

Gereako ur-jauziak ikusteko irteera egingo dute ekainaren 10ean.

Mallabiko Udalak udalerriko elkarteekin elkarlanean antolatutako Kultur Hamabostaldi oparoa iragarri du, gaur hasi eta ekainaren 11ra arte. Egitarauan, hitzaldiak, irteerak, tailerrak, Nekazaritza eta Artisautza Azoka, kirol jarduerak edo pilotari profesionalen eta afizionatuen txapelketak tartekatuko dira.

Ekitaldiak, gaur eguerdian eskolan eskainiko den Bulego taldearen kantu baten oinarritutako koreografiarekin abiatuko dira. Ekimen horrekin, eta arratsaldeko 19:00etan emango den film laburren hedapenarekin LGTBIQ+ fobiaren aurkako Nazioarteko Eguna ospatuko dute. Bihar, ‘Haurtzaroan sexu-abusuen prebentzioa’ri buruzko tailerra emango da Eskolan.

Zapatuan, Juankar Andres eta Fernando Garitagoitiak gidatutako irteera ornitologikoa abiatuko da 9:00etan; kale animazioa egongo da 18:000etatik aurrera Monstruos de la Universal konpainiaren eskutik eta ondoren gasta eta garagardoa dastatzeko aukera egongo da.

‘Mallabitarrok egina’

Datorren asteko martitzenerako, eta maiatzaren 31rako eta ekainaren 7rako, Arteterapia saioak antolatu dira. Zapaturako, hilak 27, ‘Mallabitarrok egina’ irteeraren VIII. edizio prestatu dute, eta 10:00etan abiatuta Mallabiko udal ortuen ezaugarriak ezagutzeaz gain, Longa auzoak gordetzen dituen ‘altxor’ historikoak ezagutzeko aukera izango da. 13:30ak aldera bazkari autogestionatua egingo dute Trabaku Goikon. Arratsaldean, briska txapelketa eta herri kirol erakustaldia egongo dira.

Maiatzaren 29an ‘Kolesterola’ri buruzko hitzaldia emango du Maite Gonzalez osteopatak, eta jubilatuen txokolatada egongo da.

Ekainaren 1ean, Menditour Film Festivaleko ‘Agur Artzai’, ‘Adrenaline Sucks’, ‘Not Alone’, ‘Creation Theory’ dokumentalak emango dira, eta hurrengo bi egunetan olinpiadak egingo dituzte eskolan. Barikuan, gainera, ‘Gure gorputzetara hurbilduz: hilekoaren osasuna’ hitzaldia egongo da, eta hurrengo egunean Mendibil abesbatzak eta Zornotzako Dizrdira ahots taldeak Udaberriko kontzertuak ekimeneko saioa eskainiko dute.

Biharko Izarrak eta Bizkaia Torneoa

Pilotari profesionalak eta afizionatuak partaidetza azpimarragarria izango dute aurtengo Kultur Hamabostaldian. Izan ere, Biharko Izarrak afizionatuen txapelketa ospetsuaren partiduak maiatzaren 18an eta 25ean jokatuko dira; ekainaren 1ean finalerdiak izango dira eta finala ekainaren 9an.

Bizkaia Torneoaren partidak ekainaren 3an jokatuko dira, 17:15etatik aurrera. Txapelketa horretan lehiatzen diren pilotari profesionalek lau t’erdiko, binakako eta buruz buruko norgehiagokak jokatuko dituzte.

Ekainaren 10ean ere, Mallabia I pilota taldeak antolatutako pilota partidak egongo dira.

Urtero antolatzen den Nekazaritza eta Artisautza Azoka, ekaineko lehenengo domekan egingo dute, eta eguerdian, Gazte Alai dantza taldearen ekitaldia egongo da.

Aurtengo Kultur Hamabostaldia, ekainaren 9rako prestatu duten denboraldi amaierako jaiarekin; hurrengo egunean egingo den Gereako ur-jauziak ikusteko irteerarekin, bazkari autogestionatuarekin eta ‘Sofocos’ antzezlanaren emanaldiarekin; eta domekan egongo den bizikleta zaharren eta berrien erakustaldiarekin borobilduko da.

La entrada LGTBIQ+ Fobiaren aurkako Nazioarteko Egunarekin hasiko da Mallabiko Kultur Hamabostaldia se publicó primero en durangon.com.