Domeka eguerdian hasiko den ‘Aintzinako eztegua’ren antzezpenarekin abiatuko dira Iurretako Oromiño auzoan ospatuko dituzten San Marko jaiak. Auzotarrek prestatutako egitarauak jarraipena izango du ondorengo egunetan eta hurrengo asteburuan.

‘Aintzinako eztegua’ren antzezpena Oromiño auzotik San Markoren baselizaraino eguerdian egingo den ibilaldiarekin hasiko da. Ondoren, ezteguaren antzezpena egingo dute trikitilarien doinuek girotuta, eta partaideek bazkaria ere egungo dute. Bazkalostean kantuak eta dantzak egongo dira Eingo taldearen partaidetzarekin.

Oromiñoko ‘San Markuek’ astelehen iluntzean jarraituko dute Donien Atxa jaso ondoren, eta jarraian, makailau errea dastatzeko aukera izango dute partehartzaileek. Eguna borobiltzeko igel txapelketa egongo da.

Martitzenean, San Marko egunez, meza emango da eguerdian eta jarraian herri-bazkaria egingo dute. Arratsaldean, hainbat sari banatuko dituen briska txapelketa jokatuko da.

Erromeria Luhartz taldearekin

Ospakizunak jarraipena izango dute asteburuan, eta zapatuan, 17:00etatik aurrera, Maiztegi Herri Eskolako umeen dantza erakustaldia egongo da. Ondoren, haurrentzako jolasak eta txokolatada egongo dira.

Iluntzean, tortila txapelketa, afaria eta Luhartz taldeak girotutako erromeria prestatu dituzte. Gauerdi inguruan, sorpresa bat iragarri dute antolatzaileek.

Domekako egitaraua eguerdian emango den mezarekin abiatuko da, eta jarraian, ekitaldia eskainiko du Mikel Deuna dantza taldeak. Arratsaldeko seietan, Muxika, Gorozika eta Ibarruriko emakumeen Oxygastra Curtisii Kultur Elkarteak ‘Amatau pantailak’ ikuskizuna eskainiko du.

Errifaren zozketarekin eta Donien Atxaren jeitsierarekin emango diote amaiera aurtengo ospakizunei.

La entrada ‘Aintzinako eztegua’ antzeztuko dute domekan Oromiñon San Marko jaiei hasiera emateko se publicó primero en durangon.com.

Mikel Urdangarinek kontzertua emango du barikuan Gerediagako foru-zelaian. (Argazkia: Josu Izarra)

Inoiz baino gehiago “herritarrei parte hartzeko gonbit” egiten duten Ondarearen Europako 2019ko Jardunaldiak ospatuko dira datorren astetik aurrera Durangaldean zein Bizkaian zehar, Bizkaiko Foru Aldundiaren eta hainbat Udal eta erakundeen babesarekin.

Iragarritako ekimenak “egunerokotasunetik ihes egiteko eta gure kulturaren zati bat geureganatzeko bidea ematen diguten adierazpen horiek nabarmendu nahi dituzte”, antolatzaileen esanetan. Herritarrak protagonista bilakatzeko asmoarekin hainbat eratako ekitaldiak iragartzen dira, besteak beste, dantza egiteko, abestiak ikasteko, antzezlanak ikusteko, horma-irudiak sortzeko edo erromesbideetatik ibiltzeko.

Eskualdean egingo diren ekimen artean Gerediaga Elkarteak prestatutako zazpi ekitaldi izango dira, tokian tokiko udalen laguntzarekin.

Gerediagako foru-zelaia. Abadiño

Abadiñoko Gerediagako foru-zelaian izango da ekitaldiei hasiera emango dion ‘Sutondotik Gerediagako Plazara!’ saioa. Datorren barikuan, urriaren 4,  arratsaldeko 19:00etatik aurrera Arrazolako Jesus eta Tere Eguskiza neba-arrebak ipuin irakurketa eskainiko dute eta jarraian Mikel Urdangarinek ‘Margolaria’ diskoan bildutako kantuak eskainiko ditu.

Garai

Hurrengo hitzordua biharamunean izango da Garain, arratsaldeko 19:00etan hasita. Momoitioko San Juan baselizan hasi eta Elizabarrira arteko joanaldiak 70eko hamarkadara arte heriotzaren gainean egon diran sinesmen eta errituak ezagutzeko aukera emango du. Jarraian, laukote ahots zurien kontzertu laburra eta hileta-kultuan erabiltzen ziren objektuen erakusketa txikia egongo dira.

Otxandio

Juan Mari Beltran musikologoak emandako hitzaldia eta Otxandioko Soinubil taldeak herriko kantuekin hornitutako kalejira egingo dute Otxandion urriaren 12an, 18:00etatik aurrera, ‘Kantuz biziz’ deituriko ekitaldian.

Izurtza

Sendabelarrak izango dira mintzagai Izurtzan urriaren 19an, 10:30ean gazteleniaz eta 12:30ean euskaraz. Mentxu Amantegik gidatuko duen ibilbide-tailer didaktiko eta praktikoan egun jakin batzuetan sendabelarrak biltzeko tradizioa izango da mintzagai.

Mañaria

Egun berean, baina arratsaldeko 16:30ean, ipuin-kontaketa eta haur-jokoak izango dira Mañarin. ‘Durangaldeko kontuak’ deituriko saioan Errose Bustinza eta Kirikiñoren ipuinak izango ditu abiapuntu Peru Madalenak bere kontaketa egiteko.

Berriz

‘Pilota jokoa: Zelaietatik Pilotalekura’ izango da Berrizen urriaren 26an egingo den ekimenaren izenburua. Arratsaldeko 17:00etatik aurrera, pilota mota ezberdinak ezagutu eta bote luzeko partidu bat barrutik ezagutzeko aukera izango da Berrizburu frontoian egingo den erakusketa, erakustaldia eta pilota partiduarekin.

Iurreta

Iurretan, urriaren 27an Jose Antonio Azpiazuk emango duen ‘Gorulariak, lihoaren dantza’ hitzaldiarekin eta jarraian Mikel Deuna dantza taldeak eskainiko duen dantza erakustaldiarekin osatuko dira Gerediagak prestatutako ekitaldiak.

Ekitaldi guztiak doakoak badira ere aurrez izena ematea ezinbestekoa da, ekintza batzuetan leku mugatua izaten delako. Horretarako ejardunaldiak@gmail.com e-postara idatzi edo bulego orduetan (9:00-13:00 / 15:00-18:00, astelehenetik ostegunera, eta 8:00-15:00, ostiraletan) 673005981 telefonora deitu daiteke.

Atxartetik Urkiolara

Aipatutako ekitaldiez gain beste hainbat proposamen izango dira eskualdeko herrietan.  Urriaren 20an ‘Erromeriak eta Erromesbideak’ deituriko ibilbide gidatua egongo da, Atxarteko Kristo Santua baselizatik abiatuta eta Urkiolako santutegiraino helduko dena. Toki Alai-Urkiolako Parketxeak antolatutako ekitaldian parte hartzeko  946 814 155 telefonoan edo urkiola.parke.naturala@bizkaia.eus helbide elektronikoan egin behar dira erreserbak.

Otxandio

Egun berean ADR Gorbeialdek eta Aunia Kultura Elkarteak antolatutako ‘Jaietako limoi edariak eta Astikurutzeko elur zuloa’ deituriko bisita gidatua egingo da Felix Mugurutzaren azalpenekin lagunduta. 11 kilometroko ibilbidean parte hartzeko Gorbeiako Turismo Bulegoaren 946 122 695 telefonora deitu edo turismo@gorbeialdea.com helbide elektronikora idatzi behar da.

Zornotza

Urriaren 20an izango da ere ‘Kantuz kantu’ kontzertua Amorebieta-Etxanoko Zornotza Aretoan, 12:00etan.

Durango

Durangoko Arte eta Historia Museoak Jabier Kaltzakortak emango duen ‘Euskal baladak’ hitzaldia antolatu du urriaren 3rako, arratsaldeko 19:00etan. Kaltzakortak egindako bilketa lanak Antonio Zavalak hasitakoari jarraipena eman zion eta berbaldian olerki-adierazpen horiek euskal kulturan duten garrantziaz mintzatuko da.

Durangoko Turismo Bulegoak Belen Bengoetxeak eta Teresa Camposek gidatutako bisitaldiak prestatu ditu urriaren 19, 20, 26 eta 27rako. ‘Zein soinu egiten duzu, Feliciana?’ deituriko ekimenean kanpai-dei ezberdinen azalpenak eta Santa Anako kanpandorrera igotzeko aukera egongo da. Informazioa eta erreserbak egiteko 946 033 938 telefonora deitu behar da.

Elorrio

Elorrion urriaren 6an ospatuko den Errebonbiloen jaia ere Ondarearen Europako Jardunaldien egitarauan dagoela eta, Turismo Bulegoak Errebonbiloekin egun pasa egitea proposatzen du, goizaldeko 5:00etan egiten den kalejiran hasita. Horretarako 94 682 01 64 edo 688 776 270 telefonoetara deitu behar da erreserba egiteko.

La entrada Eskualdeko ondarearen hainbat atal ezagutzeko aukera izango da urrian se publicó primero en durangon.com.