Karrika Antzerki Taldeak 25. urteurreneko ekitaldi nagusia ospatuko du datorren asteko zapatuan, nahiz eta zilarrezko ezteiak iaz bete zituzten. Taldea 1998an sortu zen, “institutuko eta Kurutziaga ikastolako ikasleekin eta Berbaroko kideen parte-hartzearekin”, gogoratzen du Maite Lopezek, hasieratik jarraitzen duen taldekide bakarrak. “Garai hartan izaera desberdineko hainbat talde sortu ziren euskararen alde lan egiteko helburuarekin”.

Taldea sortu eta gutxira elkartu ziren Jose Martin Urrutia ‘Txotxe’ elgoibartarra eta Elena Fernandez. ‘Txotxe’k bere jaioterrian lehenik eta geroago Kurutziaga Ikastolako antzerkigintza proiektuan lortutako esperientzia baliatu zuen taldeak behar zuen bultzada emateko.

“Hasiera batean 15 edo 20 pertsona bildu ginen eta hankapaluek erabiltzen, dragoiak zelan egiten ziren, antzerki ariketak egiten, jolasten… ibiltzen ginen” gogoratzen du Lopezek. Ilusioa gainezka zuen talde hark sortutako lehen ekoizpenari ‘Fartsa’ izenburua ipini zioten.

Konpainiak sorreratik jarraitutako ibilbidean 25 edo 30 ikuskizun estreinatu ditu, “urte batzuetan antzezlan bat edo bi sortzen genituelako”, Lopezen esanetan.

Eszenatokiak, kaleak eta erreka

Hogeita bost urteko ibilbidean “100 pertsonatik gora izan dira Karrikako taldekide” Lopezen arabera, “urte batzuetan beste batzuetan baino partaide gehiago izan direlako”. Momentu honetan zazpi kide dira taldea osatzen duten partaideek.

Antzezlanak errepresentatzeko ohiko agertokiak eszenatokiak, plazak edo kaleak badira ere, Karrikakoek beste toki batzuek ere aprobetxatu dituzte antzezpenak egiteko. “Gure taldea eta San Agustin Kultur Gunea urte berean sortu ziren, eta aretoaren eta gure 10. urteurrena batera ospatu genuen. Urte horretan kalean eta areto barruan antzezten genuen ‘Ametsen faktoria’ ikuskizuna eskaini genuen ekitaldian, eta Karrikako kide batzuk hankapaluekin eta txalupekin argiztatuta zegoen Mañaria errekan aritu ziren”, gogoratzen du Lopezek.

Ospakizuna

25. urteurrenaren ospakizunak San Fausto jaietan txosnagunean piztutako txupinazoarekin hasi bazituzten ere, ekitaldi nagusia datorren asteko zapatuan egingo dute, hilaren 20an. Karrikako egungo kideak eta noizbait taldean izan direnak 17:30ean elkartuko dira Santa Ana plazan. Bertan makillatzeko aukera izango dute Alde Zaharrean zehar musikaz lagunduta egingo duten kalejirari hasiera eman aurretik.

19:30ean 25. Urteurrenaren Gala hasiko da San Agustin Kultur Gunean eta ekitaldiaren amaieran brindisa eta luntxa izango da.

Ekitaldietan parte hartzea nahi dutenek info@karrikaantzerkia.eus helbide elektronikora idatzi edo 667 923 891 telefono zenbakira deitu behar dute. Galara bertaratzen direnei zilar koloreko zerbait eramatea eskatzen diete.

La entrada “100 pertsona baino gehiago izan dira Karrika Antzerki Taldeko kideak une batean edo bestean” se publicó primero en durangon.com.

Uzta oparoarekin gerturatu dira Durangaldeko sortzaileek 53. Durangoko Azokara, Landakon jarritako erakusmahaietan eskualdeko zigilua duten literatura lanak, ipuinak, komikiak, musika proposamenak eta bestelakoak eskuragai baitaude. Aniztasuna goiburu duen edizio honetan, bertaratzen den bisitariak estilo eta itxura ugariko sorkuntzak aurkituko ditu.

Bere lehenengo liburuarekin dago Bego Goitia durangarra Landakon. Autoekoizpenaren bidez argitaratutako ‘Kaka dantzaria’ 0 eta 8 urtera bitarteko umeei zuzenduta dago. Miren Amuriza bertsolari berriztarrak berriz, familia ereduen aniztasunaren aldeko apustua egiten duen ‘Familia Milakolore’ ipuin bilduma aurkezten ari da.

Unai Iturriaga bertsolariak Alex Sanvirekin batera egindako ‘Haur Besoetakoa: Paristik datorren artista’ komikiarekin dago Ikastolen Elkartearen standean. Iturriagaren gidoian oinarritutako liburua gazteei zen helduei zuzendutako sorkuntza da.

Durangon bizi diren Leire Bilbao ondarrutarra eta Paddy Rekalde bilbotarra ere gaztetxoei zuzendutako lan berriekin daude Landakon. Bilbaok, Pirritx, Porrotx eta Marimototsekin, Xabier Zabalarekin eta Maite Mutuberriarekin elkarlanean sortutako ‘Musua’ disko-liburua aurkezten ari da egunotan eta Rekaldek ‘Itsasadarreko kontuak’ liburu berria ekarri du Azokara.

Eider Eibar ilustratzaile zornotzarrak lan berri bi ditu Azokan. Alde batetik, Iskander Sagarminagarekin egindako ‘Kokoak, marrazkiei kosk!’ lan berria aurkeztuko du eta bestetik, Uxue Alberdik idatzitako ‘Poza’ liburuko irudiak egin ditu.

‘Txotxe’ eta Sarrionandia

Antzerkiak ere bere lekua du Durangoko Azokan eta atal horretan aipamen berezia merezi du Eztenak jaialdiak egindako ekarpena. Oreretako ekimen horrek otsailean hil zen Jose Martin Urrutia ‘Txotxe’k idatzi eta Karrika antzerki taldeak eszenaratutako ‘Ametsen faktoria’ antzezlanaren testua argitaratu du.

Lan berri bat aurkezten duen bakoitzean gertatzen den bezala, aurten ere Joseba Sarrionandia izango da Azokak ateak ixten dituenean ale gehien saldu dituen sortzaileetariko bat. Kuban bizi den idazle iurretarrak ‘Bizitzea ez al da oso arriskutsua? Habanako gaukaria’ liburuarekin dator. Kartzelan idatzitako ‘Ni ez naiz hemengoa’ obran egin zuen bezala, testu laburrez osatuta dago lan berria, baina oraingoan La Habanako gauetan idatzitako piezak tartekatzen ditu.

Ikertzaileek ere bere lekua izaten dute Landakon eta oraingoan labetik atera berria den ‘Jatorriak. Elorrio. Orígenes. San Agustin 1053- Elorrio 1356’ liburuarekin dator Rikardo Ajuria historialaria.

Mikel Onaindia arte historialariak berriz, Bilboko Arte Ederren Museoak  argitaratu duen ‘Después del 68 : arte y prácticas artísticas en el País Vasco 1968-2018’ katalogoa argitaratu du eta bertan azken 50 urteotako euskal sorkuntzaren errepasoa egiten duen.

Azokako standetan ohikoak badira sukalde errezeten liburuak, aurten Zigor Iturrietak ETBko Txoriene programan egindako errezetak batzen dituen ‘Txorieneko lau urtaroak’ bilduma gerturatu du.

Mendiko gaiei lotutako liburuak ere bere lekua dute Azokan eta aurten afizio hori eta korrika batzen dituen lana gerturatu du Oihana Azkorbebeitia abadiñarrak. ‘Mendiaren altzoan’ liburuan mendi lasterketetan bizitako hainbat gertaera kontatzen ditu.

Eskualdeko musika taldeek ere berain azken sorkuntzak esakaintzeko aukera baliatu dute, horietako pare bat Pott Produkzioak ekoiztetxearen bidez. Bertan, Txapito Guzman eta Ibarrako Langostinuek eta State Alerta talde abadiñarren lanez gain, Hartz zein Egurra eta kitto! azpeitiarren, Nomadak bergararren edo Dekot jatabetarren proposamen berriak eskuragai daude.

Zinea eta dantza

Eguneko egitarauan badago zer nabarmendu. Irudienean, Eneko Sagardoy antzezle durangarra protagonista duen ‘Errementari’ pelikula emango da eguerdian eta arratsaldean ‘Aralar, mundua leku den lurra’ dokumentala eskainiko da. Ahotsenea, beraien disko berriak aurkeztuko dituzte Tooth, Maddi, Ertzak, Iker Lauroba, Hibai edo Hezurbeltzak, besteak beste, eta gune horretako solasaldien aretoan Pako Aristik, Oier Guillanek, Asisko Urmenetak edo aurtengo kartela egin duen Txakur Gorria kolektiboak euren proposamen berriak aurkeztuko dituzte.

Areto Nagusian, Esloveniako Barbara Pregelj eta Peter Sventina, Juan Kruz Igerabide, Amaia Apalauza eta Elizabete Manterolarekin arituko dira ‘Besteak gure ispilu’ deituriko solasaldian. Szenatokian berriz, ‘Baserri’ dantza ikuskizuna eskainiko du Larrua Proiektuak eta egunari amaiera emateko Modus Operandi taldearen kontzertua izango da Plateruenan.

La entrada Eskualdeko sortzaileek uzta oparoa gerturatu dute Landakora se publicó primero en durangon.com.

Antzerki sustatzaile izan zen Jose Martin Urrutia ‘Txotxe’k idatzi eta zuzendutako azken antzezlana taularatuko da barikuan Zornotza Aretoan. ‘Txotxe’ otsailaren 4an hil zen, baina “ikuskizunak aurrera egin behar du” esaldiari eutsi eta berak sortutako ‘Deshakespereazioa’ azken ikuskizuna eszenaratuko du Karrika konpainiak, iluntzeko 20:15ean hasita.

‘Txotxe’k idatzitako antzezlanak Shakespeareren testuak hartzen ditu abiapuntu. Lehen bertsioa ‘Hitzari gorazarre’ zikloaren baitan estreinatu zen Durangon eta ondoren 51. Liburu eta Disko Azokaren irekiera eta amaiera saioetan antzeztu zen.

Ikuskizuna erabat eraberritu ondoren, Durangoko San Agustin Kultur Gunean estreinatu zen irailean, konpainiako antzezleak eta Bartolome Ertzilla Musika Eskolako zenbait musikariren partaidetzarekin.

Familia diruduna

Teloiak gora egin eta berehala Londreseko XVI. mendeko azoka batean murgiltzen da antzezlana. Aguazila, artile saltzailea, lore saltzailea, perfume saltzailea, … eta harakina? Itxura baten, Shakespeare familia diruduna eta katolikoa zen. XVI. mendean ordea, Ingalaterran protestanteak nagusitu ziren, eta ondasun guztiak galdu zituzten.

Hari horri tira egin eta ‘Txotxe’ eta Karrikako kideek dramaturgo ingelesaren bizitzaren hutsuneak betetzen saiatu ziren. Izan ere, “Shakespeare harakin-idazle bihurtu dugu, eta azoka zoro hau izango du bere inspirazio iturririk handiena”, konpainiako kideen esanetan.

La entrada Txotxeren ‘Deshakespereazioa’ antzezlana eszenaratuko du Karrikak Zornotza Aretoan se publicó primero en durangon.com.