Durangaldeko Mankomunitateak ‘Familientzako Eskolak’ ekimenaren edizio berri bat antolatu du datorren urterako. Guztira, bost gai desberdin landuko dituzten zortzi ikastaroez gain bi hitzaldi eskainiko dira. Izen ematea abenduaren 29ra arte egin daiteke.

Ikasleen familiei eta interesatuta dauden heldu guztiei zuzendutako ekimen honen bitartez, drogomenpekotasunak, osasuna, familien arteko komunikazioa edo gatazken konponketa bezalako gaiak landuko dira. Amaia Sarrionandia, Teresa Alonso eta Arrate Arana profesionalak eskainiko dituzten saioak dinamikoak, parte-hartzaileak eta praktikoak izango dira.

Talde bakoitza osatzeko eta ikastaroa aurrera eramateko, gutxienez, 12 pertsona egon behar dira, eta gehienez 20 pertsona. Ikastaroak otsailean hasiko dira eta 90 minutuko hiru eta sei saio artekoak izango dira.

Zortzi saioetatik sei Durangoko Elkartegian emango dira. Antolatutako ikastaroak honako hauek izango dira: ‘Tentsioak, estresa eta antsietatea kontrolatzea’; ‘Mundu bat deskubritzeko, 0-6 urte’, ‘Prebentzioa haurtzaroan, komunikazioaren eta autoestimuaren bidez (6-12 urte)’, eta ‘Nerabezaroan jokoa, kontsumoak,… ez daitezela arazo bihurtu’.

‘Zigor, mehatxu eta txantaiak erabili beharrean, badago beste aukerarik?’ deituriko ikastaroa berriz, Elorrion eta Abadiñon emango da.

Ikastaroez gain, bi itzaldi emango dira Berrizen eta Zaldibarren: ‘Querer sin condiciones’ eta ‘neba-arreba arteko harremanak’.

Ikastaroetan izen ematea 946200520 telefonoan (goizez 9:30etatik 13:30etara), e-mailez adikzioak@dma.eus helbidean edo Durangoko Landako Elkartegian (Landako etorbidea 4 – 202 bulegoa) egin daiteke.

La entrada Durangaldeko Mankomunitatearen ‘Familientzako Eskolak’ bost gai desberdin landuko ditu 2024an se publicó primero en durangon.com.

Udalak Berrizko Jubilatuen Etxea Nagusien Etxea-Pertsona Nagusien Zentroan bilakatu du, eta, horretarako, alboko lokala birgaitu du. Guztira 350 metro karratuko azalera duen espazioan, orain arte eskaintzen ziren zerbitzuei zahartze aktiboago eta osasuntsuagora bideratutakoak gehitu zaizkie.

Eraberritze integralerako 540.000 euroko inbertsioa egin ondoren, Udalak inauguratu duen espazioan jubilatuen ohiko jarduerak mantenduko dira. Ohiko taberna-kafetegiko zerbitzuari estilo amerikarreko sukalde bat gehitu zaio, eta gainera elkargunea, kartetan jolasteko edo hitz egiteko gunea ere egongo da.

Horrez gain, erabiltzaileek eskatu zuten bezala, jarduera dinamikoagoak eta prebentiboagoak egiteko gune bat izango dute, zahartze aktiboagoa eta osasungarriagoa lortzeko helburuarekin.

Erabilera anitzeko gunea

Jubilatuen alboan zegoen liburutegi zaharreko lokalean “erabilera anitzeko gune bat sortu da, hiru areto dituena, tailerrak, ikastaroak eta hitzaldiak emateko espazioa eta Durangaldeko Mankomunitateak ematen duen Nagusilagun programa garatuko den gunea izango da. Baita Mankomunitatearekin landuko den Eguneko Arreta Zerbitzua martxan jartzeko zerbitzua ere hartuko du”, Udaletik adierazi dutenez.

Horretaz gain, beste bi gune diseinatu dira: elkarteentzako bulego bat eta podologiako udal zerbitzurako gela bat eta Zaindu zerbitzua (Mankomunitateak kudeatzen duen mendekotasuna duten adinekoen senide zaintzaileentzat laguntza, arreta eta orientazioa eskaintzen duen doako programa).

“Jubilatuen Etxe zaharraren erreforma 2017tik 2021era bitartean erabiltzaileekin burututako prozesu parte-hartzaile baten bidez” gauzatu zen, Udal ordezkarien esanetan. Prozesu horrek Pertsona Nagusien Zentro berriak erantzun beharreko errealitateak eta beharrak jasotzeko balio izan zuen.

La entrada Berrizko Udalak 540.000 euro inbertitu ditu Pertsona Nagusien Zentro berria egiteko se publicó primero en durangon.com.

Abadiñoko Udalak eskaintzen duen AbadiñoSex zerbitzua berriro dago martxan eta astelehenero ateak irekita izango ditu, 17:00etatik 19:00etara Traña-Matienako Pinu lokaletan. Gazteei zuzendutako sexualitateari eta generoari buruzko informazio eta aholkularitza zerbitzuak eskaintzen ditu.

AbadiñoSex-ek profesionalekin hitz egiteko, zalantzak argitzeko eta gogoeta egiteko konfiantzazko gunea izan gura du. Ikasturtean zehar, hitzaldiak, prestakuntza-tailerrak eta komunitatearentzako jarduerak ere antolatzen ditu, eskola-esparruan duen programaz gain.

Informazioa behar duen edonor sexuaholkularitza@abadiano.eusk helbide elektronikoaren bidez jar daiteke harremanetan, eta Instagramen (@abadiñosex) informazioa ematen da. Sentsibilizazio-kanpainak ere etengabe zabaltzen dira.

Hala, Berdintasun eta Aniztasun Sailetik parte-hartzeko deia egin zaie nerabeei eta gazteei, baita gurasoei, irakasleei, hezitzaileei, eta inguruan dituzten pertsonei ere.

AbadiñoSex-ek jarraipena emango dio aurten programari eskola-komunitatean, ikasleei, irakasleei eta familiei zuzendutako tailerrekin. “Funtsezkoa da genero-ikuspegitik alderdi  sexualean eta afektiboan hezten jarraitzea, indarkeria matxista prebenitzeko”,  Rosa Miguel Berdintasun eta Aniztasuneko zinegotziaren esanetan.

La entrada AbadiñoSex-ek Traña Matienan duen bulegoa berriro irekita dago se publicó primero en durangon.com.

Jardunaldiak gaur egungo egoera sozioekonomikoari buruzko gogoeta eragitea nahi du.

Durangoko Amankomunazgoak ‘Oinaka lurrean. Durangaldeko lurralde garapenaren erronkak’ deituriko jardunaldia egingo du ekainaren 7an. Plateruena Kafe Antzokian egingo den ekimena arlo desberdineko bost adituk eskainiko dituzten hitzaldiekin osatuko da.

Gaur egungo gizarte zein ekonomia arloan nabaria den krisi sistemikoak eraginda, “gogoeta“ bultzatzeaz gain “Mankomunitateak joka dezakeen lidergo instituzionala agertu nahi dugu erronka kolektiboari begira”, jardunaldiak koordinatzen dituen Augusto Uriarte Durangaldeko Behargintzaren zuzendaria eta jardunaldiaren koordinatzailearen esanetan.

Ekimen honen bidez “garapen planteamendu berritzaileak eta baliabide endogenoetan zein lurralde kapitalean oinarritutako prozesuak bultzatu beharra dagoela” uste du Uriartek.

‘Oinak lurrean’ goiburupean egingo den jardunaldian nazioarteko hirigintzan egindako esperientziak zein Euskal Herria landutako garapen ereduak ezagutzeko aukera egongo da. Goizeko lehen saioan Albert Cuchí arkitektoak “Giza metabolismoa eta hirigunea” gaiari buruz mintzatuko da. Hainbat erakundeko aholkularia izan den Cuchík, arkitektura eta jasangarritasunaren arteko harremana lantzen du bere zereginean.

Goizeko saioa osatuko duen bigarren hitzaldiak “Lurraldeko eskubidea” izango du izenburu eta hizlaria David Gutiérrez-Solana arkitekto hirigilea izango da. Hizlariak hirigintza, paisaia, ingurumena eta lurralde antolaketa aholkularitza lanak egiteaz gain hirigintza plangintzako erredakzio lanetan dihardu.

Juan Requejo ekonomialariak eta geografoak eskainiko duen “Lurraldean oinarritutako garapena” hitzaldiarekin hasiko da arratsaldeko saioa. Nazioarteko erakunde ezberdinetarako lana egiteaz gain, Requejo Lurralde Plangintza maila ezberdinetako lanetan zein esparru sektorial ezberdinetan aritu da.

Urduña eta Sakanako ereduak

Urduñan hamar urtez lantzen ari den Garapen Agroekonomikoari buruz arituko da jarraian Marijo Imaz Ingeniaritza Agronomoan doktorea eta Urduñako Udaleko sustapen arloko teknikaria. Imazek herriko trantsizio agroekologikoan dihardu 2006tik eta Aiaraldeko Eskualdeko Elikadura Kontseiluan hartzen du parte.

Jardunaldiko azken hitzaldia eskainiko duen Joseba Garmendia Ekonomian eta antropologian lizentziatuak, “Tokiko Garapen Endogenoaren ikuspegi teoriko eta praktikoak” izango ditu hizpide. Tokiko garapenaren arloan egindako ikerketa akademikoaz gain, Euskal Herriko hainbat esperientzietan parte hartu du, Sakanako bailaran azken urteetan eraiki den garapen estrategia osatzen lagundu duena, tarteko.

Jardunaldietan parte hartzeko beharrezkoa da izena ematea Durangaldeko Behargintzan ekainaren 3a orduko, 94 623 25 22 telefonora deituz edo behargintza.mdurango@bizkaia.org idatziz.

La entrada Amankomunzagoak eskualdeko garapenari buruzko hausnarketa eragiteko jardunaldia antolatu du se publicó primero en durangon.com.

Apirilaren 26an izango da Irantzu Varela kazetariaren hitzaldia.

Elorrioko Udalak antolatzen duen Emakume Eskolaren barne ‘Sexualitate desberdinak ulertzeko ikastaroa’ antolatu dute eta apirilaren 18an hasi eta maiatzaren 10ean amaituko den ekimena lau hitzaldiz osatuko da. Prestatutako saioetan  “sexualitate buruzko diskurtso berriei, praktikei, ikuspegi kritikoei eta mugimendu sozialei buruz” hitz egingo da.

Ekimena hau lau adituk emandako lau hitzaldiz osatuko bada ere ez dira hitzaldi solteak izango baizik eta “ikastaro baten barruan” sailkatutako hitzaldi zikloa, eskolako arduradunen arabera. Prestatutako saioetan “sexualitate ezberdinak ulertzeko modu, praktika, diskurtso edota ikuspuntu kritikoak landuko dira.

‘SexualitateaK: ereduak, desioak, gorputzak… eta +’ deituriko hitzaldiarekin hasiko dira ekialdiak apirilaren 18an. Saioko hizlaria Eider Goiburu izango da eta ekitaldia euskaraz eta erdaraz izango da. Goiburu psikologian doktoratua izateaz gain sexu hezitzailea, berdintasun teknikaria, Lahia-Nahia Elkarteko kide eta AbadiñoSex-eko arduraduna da.

‘Maitasunaren ipuina: maitasun erromantikoa desmuntatzen’ izango da Irantzu Varela kazetariak apirilaren 26an emango duen bigarren hitzaldiaren izenburua. Varela ikasketarako, sormenerako eta ekintza feministarako Faktoria Lila espazioaren arduraduna da.

Bost euroko inskripzioa

‘Sexu-genero metamorfosiak artearen bidez eta transgenero teoriak’ izango da hizpide Ainhoa Güemesek maiatzaren 3an eskainiko duen hirugarren solasaldian. Eguneko hizlaria Arte Ederretan doktoratua, kazetaria eta Berdintasun teknikaria da.

‘Lesbofobiari aurre egin’ deituriko hitzaldiarekin amaituko dira ekitaldiak maiatzaren 10ean. Azken saioko hizlaria soziologoa, psikologoa eta sexu eta genero-arretarako Aldarte Zentroko zuzendaria den Inmaculada Mujika izango da.

Saio guztiak Iturri Kultur Etxean izango dira, arratsaldeko seietatik iluntzeko zortziak bitartean eta partaide bakoitzak, bere inskripzioa onartu ondoren, bost euro ordaindu beharko ditu.

Apirilaren 13a aurretik egin behar da izen-ematea, Elorrioko udaletxean dagoen Herritarren Arreta Zerbitzuan (HAZ), genero.teknikaria@elorrio.net posta elektronikoaren bidez, edo Udalaren webgunean dagoen izen-emate orria inprimatu, bete eta Berdintasun Zerbitzura postaz bidaliz.

La entrada Sexualitate desberdinei buruzko lau hitzaldi izango ditu Elorrioko Emakume Eskolako ikastaroak se publicó primero en durangon.com.