Azpen eman zuen botoa Bittor Arginzoniz sukaldariak.

Gure Esku Dago ekimenak antolatutako herri galdeketak egin ziren atzo Bizkaiko eta Gipuzkoako 13 herri eta hiritan, tarteko Durangaldeko Atxondon eta Otxandion tarteko. Partaidetza maila gorabeheratsua izan bazen leku batzuk eta besteak konparatuta, otxandiarren  partaidetza ia %50era heldu zen eta atxondarrena %31 gainditu zuen.

Ia bi herritarretik batek eman zuen botoa atzo Otxandion. Guztira, 16 urtetik gorako 1060 herritarrek zuten bozkatzeko aukera eta 498k (%46,98a) baliatu zuen eskubidea.

Herritarrek “Nahi al duzu euskal estatu burujabe bateko herritarra izan?” galdera erantzun behar zuten eta %92,17ak baiezkoa eman zioten. %3,21ak ezetz bozkatu zuten; %2,81ak boto zuria eman zuen eta baliogabeen kopurua %1,81a izan zen.

16 urtetik gorako 1197 herritarrek zuten botoa emateko eskubidea Atxondon eta 376k ( %31,41ak) baliatu zuen eskubidea Apatamonasterioko plazan edo Axpeko plazan jarritako hautestontzietan.

Emandako botoen %88,17ak baiezkoa erantzun zion “Euskal Herri independente bateko herritarra izan nahi duzu?” galderari, %10,11k ezezko laukitxoa markatu zuen eta %1,60ak boto zuria eman zuen. %2,13ak baliogabeko botoa eman zuen.

13 herritan atzo egindako kontsultetan batez besteko boto emaileen kopurua %13,07a izan zen, bozkatzeko eskubidea zeukaten 160.000 herritar ingurutik 21.000k botoa eman baitzuen.

La entrada Otxandiarren ia %50ak eta atxondarren %32ak eman zuen botoa atzoko herri galdeketan se publicó primero en durangon.com.

Abadiño, Durango, Elorrio, Zaldibar eta Zornotzan herri-galdeketak egin ostean, Atxondon eta Otxandion bozkatuko dute domekan.

16 urte eginda dituzten atxondarrek eta otxandiarrek domeka honetan egingo diren herri galdeketetan parte hartzera deituta daude. Atxondoko eta Otxandioko Gure Esku Dago ekimenak deituriko bozketetan, 2300 herritar inguruk erabakitzeari buruzko botoa emateko aukera izango dute.

Atxondon egingo den herri galdeketara 16 urte beteta dituzten 1199 herritar deituta daude. Bi hautesleku egongo dira, bata Apatamonasterioko plazan eta bestea Axpekoan. Hautestontzietan botoak emateko aukera goizeko 9:00etan hasiko da eta gaueko 20:00etan amaituko da.

Botoa ematera gerturatzen diren herritarrek galdera bakar bati erantzun beharko diote, baiezko edo ezezko laukitxoan marka jarriz: “Euskal Herri independiente bateko herritarra izan nahi duzu? (¿Desea ser ciudadano/a de una Euskal Herria independiente?).

Domekan herrian egongo ez diren atxondarrek, edo aldez aurretiko botoa eman nahi dutenek, gaur eta bihar bozkatu ahal izango dute Gure Esku Dagok Jose Antonio Agirre eta Lekube etorbidean duen lokalean. Bertan botoa emateko ordutegia arratsaldeko 19:00etatik 21:00etara izango da.

Otxandion berriz, hainbat herritarrek baliatu dute dagoeneko bozkatzeko eskubidea, urriaren 22a Mekoletako plazan eta 28a Otxandioko plazan aldez aurreko botoa emateko egunak izan zirelako. Domekan herriko plazan jarriko diren hautestontziak, goizeko 9:00etatik gaueko 20:00ak arte egongo dira irekita.

16 urtetik gorako 1100 otxandiarrek erantzun behar duten galdera hau da: ‘Gure dozu euskal errepublika burujabe bateko herritarra izan? (¿Quieres ser ciudadano/a de una república vasca soberana?)’.

Atxondon zein Otxandion bozkatu nahi duten herritarrek Nortasun Agiri Nazionala (NAN), Euskal Herriko Nortasun Agiria (EHNA), pasaportea, gidabaimena edo baliogarria den dokumentua aurkeztu beharko dute.

Eskualdeko bi herrietan egingo diren bozketak, maiatzaren 7an Durangaldeko zenbait herritan (Abadiño, Durango, Elorrio, Zaldibar eta Zornotza) egindakoen ondoren datoz.

Atxondo eta Otxandioko herritarrak ez dira izango domekan bozkatzera deitutako bakarrak, guztira Bizkaiko eta Gipuzkoako 160.000 pertsona inguru botoa emateko deituta daudelako. Bizkaiko Areatza, Berango, Erandio, Elantxobe, Galdakao, Getxo, Mundaka, Ibarrangelu eta Leioa herrietako boto-emaileez gain, Gipuzkoako Andoain eta Beizamakoek ere bozkatzeko aukera izango dute.

La entrada Erabakitzearen aldeko herri galdeketak egingo dira domekan Atxondon eta Otxandion se publicó primero en durangon.com.

Durangoko Gure Esku Dago ekimenak antolatutako tonbolaren zozketa egin zen domeka arratsaldean eta bertan zotz egindako 132 sariak dagoeneko zenbaki bati lotuta daude.

Euro baten truke saldutako txartel bakoitzarekin sekulako sariak lortzeko aukera zegoen. Zozketaren antolatzaileek, besteak beste, landetxeetan asteburuak, bainuetxe eta spa-guneetarako sarrerak, masajeak, etxetresna elektrikoak, dozenaka afari eta gosari, oparitan gastatzeko ehunka bale edo Athletic-eko jokalarien kamisetak irabazteko aukera ematen zuten.

Zenbaki sarituak ondoko argazkian agertzen dira eta sari bakoitzaren irabazleek Gure Esku Dagok Artekale 14an duen bulegotik pasa behar dira sariak jasotzeko, maiatzaren 10etik 14ra bitartean, arratsaldeko 19:00etatik 20:00etara.

La entrada Gure Esku Dago ekimenak tonbolaren 132 sariak zozkatu ditu se publicó primero en durangon.com.

Durangon, Zornotzan, Elorrion, Abadiñon eta Zaldibarren egingo dute gaur herri-galdeketa.

Durangoko zinegotziek elkarrekin bozkatu zuten ostiralean.

Ia 250.000 euskal herritar daude deituta gaur egingo diren herri-kontsultetara, hauetatik  55.685 eskualdeko lau herritan eta Zornotzan. Euskal Herriko 52 udalerritan egingo dira herri-galdeketak guztira, Durangaldeaz gain Debabarrena, Lea Artibai, Uribe Butroe, Uribe Kosta zein Urola Kostako bailaretan ere kontsultak egingo baitira.

Herri bakoitzean erabakitzearen aldeko eskubidearekin lotutako galdera bat erantzun behar da eta Durangaldean zein Zornotan galdera desberdinak prestatu dituzte. Galdera-sorta horrek,  hala ere, zentzu berdina du kasu guztietan, herritarrek euskal estatu bateko kidea izan nahi duten edo ez baita jakin nahi dena. Erantzunak hiru motatakoak izan daitezke: bai, ez edo boto zuria.

Herri bakoitzean prestatutako hauteslekuak goizeko 9:00etatik arratsaldeko 20:00ak bitartean egongo dira irekita. Zornotzako auzoetan jarriko diren hautesontziak berriz, goizez bakarrik irekiko dira.

Durango

Duragon bozkatzeko eskubidea duten 24.768 herritarrek “Bere etorkizuna modu librean erabakiko duen euskal estatu bateko herritarra izan nahi duzu?” galderari erantzungo diote.

Udalerrian zehar kokatuta egongo diren bost hautesleku irekiko dira: Tabiran, Ezkurdin, Landakoko Ibaizabal auzoan, Askatasun etorbidean (Herrian) eta San Fausto auzoan.

Antolatzaileek Ezkurdin egingo den ‘Erabaki jaia’ ere prestatu dute, tarteko eguerdian egingo den nazio mailako ekitaldi nagusia. Goizeko 11:00etatik aurrera txistularien kalejira, trikitilariak, bertsolariak eta txalapartariak egongo dira eta 12:30an burutuko den ekitaldi nagusian Gure Esku Dago ekimeneko Zelai Nikolas eta Angel Oiarbideren egongo dira. Ondoren Hotzikara eta Durangoko dantzarien saioak egongo dira.

Arratsaldean puzgarriak, Doinu taldea, Joseba Agirre eta Unai Abaunza kantariek, Seneglago doinuak, Bertzi Jazz Band eta Txupito Guzman eta Ibarrako Langostinuek eta tonbolaren zozketa egingo dute.

Zornotza

Zornotzan 15.973 herritar izango dira bozkatzeko eskubidea baliatu dezaketenak eta kasu honetan erantzun behar den galdera honako hau da: “Nahi al duzu euskal estatu burujabe bateko herritarra izan?”.

Zornotzarrek  bost hautesleku izango dituzte euren botoak emateko. Hiriguneko herritarrek Zelaieta parkean jarritako karpan eman dezakete botoa 9:00etatik 20:00etara bitartean. Boroan (txokoa), Larran (Propi ondoko txokoa), Etxanon (frontoi ondoa) eta Euban (harategi ondoko lokala) ere botoa emateko aukera egongo da, kasu honetan 9:00etatik 14:00etara.

Goizeko 11:30etatik aurrea hainbat ekitaldi egongo dira Zelaieta parkean eta inguruan. Goizean zehar txalaparta, bertsolariak, umeentzako tailerra, Alaiak, Andra Mari eta Korala abesbatzen saioak eta Udabarri dantza taldearen ekitaldiak egongo dira.

Arratsaldean Bizkargi 1934 zanpantzar taldea, Zaparrada batukada eta Oxabi taldeak eskainiko duen erromeria tartekatuko dira.

Elorrio

6.216 elorriar daude deituta gaurko galdeketara eta prestatuko den hautesleku bakarra herriko plazan egongo da. Bozkatzera gerturatzen diren herritarrek “Euskal estatu burujabe bateko herritarra izan gura dozu?” galdera erantzun behar dute.

Elorrion ere hainbat ekitaldi prestatu dituzte egun osorako. Goizean zehar, herriko txistularien kalejira, Egundo-i taldearen ekitaldia, plazan egingo den bermut-dantza egingo dira eta 14:00etan ekitaldi nagusia hasiko da. Arratsaldean Besaide dantza taldearen agerraldia, trikitilariak eta aurreskua dantzatuz osatuko da egitaraua.

Abadiño

Bi hautesleku izango dituzte galdeketara deitutako 6.140 abadiñarrek. Bata, Zelaietako Txanporta plazan egongo da eta bestea, Traña-Matienako Traña plazan. Abadiñarrek bi galdera erantzun behar dituzte. Lehena, “Nahi al duzu euskal estatu burujabe baten herritarra izan?”; eta baiezko erantzuna eman bada “Nahi al zenuke euskal estatu hori independentea izatea?” bigarren galderari erantzungo diote.

Abadiñon prestatutako egitaraua herriko bi auzo nagusietan burutuko da. Txanporta plazan, txistularien kalejira, tailerrak eta puzgarriak, trikitilariak eta akordeoi-joleak egongo dira eta Trañan berriz, herri-kirolak, kantu kalejira, trikitilariak eta tailerrak izango dituzte. Auzo bietan txokolatadak egingo dituzte eguna borobiltzeko.

Zaldibar

Zaldibarren jarriko den hautesleku bakarra Herriko plazan egongo da eta bertan 2.588 herritarrek eman ahal izango dute botoa. Zaldibartarrek “Nahi duzu Euskal Herria independentea izatea?” galdera erantzun behar dute.

La entrada Eskualdeko eta Zornotzako ia 56.000 herritarrek bozkatu dezakete gaurko herri-galdeketan se publicó primero en durangon.com.

Gure Esku Dagok deitutako herri-galdeketarako aldez aurreko botoa eman zuten atzo Durangoko alkatea den Aitziber Irigorasek eta EAJko zinegotziek. Galdeketaren antolatzaileek Durangoko Artekale 14an jarri duten aldez aurreko botoa emateko hauteslekuan eman zuten euren botoa.

Aurretiazko botoa eman nahi duten 16 urtetik gorako durangarrek, gaur dute bozkatzeko azken eguna, Artekaleko hauteslekua irekita egongo baita arratsaldeko 18:30etik 20:30era.

400 herritar inguruk aprobetxatu du dagoeneko aldez aurreko botoaren aukera. Bozkatu dutenek domekan erantzun behar den galdera berari erantzun diote; hau da, ‘Bere etorkizuna modu librean erabakiko duen euskal estatu bateko herritar izan nahi duzu?’.

La entrada Irigorasek eta EAJko zinegotziek aldez aurreko botoa eman zuten se publicó primero en durangon.com.

Bideoklipean herriko hainbat musikari agertzen dira, Arantza eta Pantxo, Han taldeko Nerea Lersundi, Bultz taldeko ‘Xagu’ eta Sugoi taldeko Mikel Quesada, besteak beste. Musikarien agerpenekin tartekatuta hainbat elorriar agertzen dira, maiatzaren 7ko herri-galdeketan parte hartzeko gonbitea eginez.

La entrada Elorrioko hainbat musikarik maiatzaren 7ko herri-galdeketaren aldeko bideoklipa egin dute se publicó primero en durangon.com.

Elkarretaratzea egin dute eguerdian sindikatuetako ordezkariek eta zenbait enpresetako delegatuek.

Durangaldeko eta Zornotzako ELA, LAB, CCOO, UGT, ESK, CGT, STEE-EILAS, EHNE eta HIRU sindikatuetako ordezkariek eta eskualdeko 57 enpresetako langile batzordeek bat egin dute Gure Esku Dago ekimenak maiatzaren 7rako deitutako herri-galdeketekin. Abadiñon, Durangon, Elorrion, Zaldibarren eta Zornotzan egingo diren galdeketetan, herritarrek Euskal Herriaren etorkizunari buruzko iritzia emateko aukera izango dute.

Eskualdeko bost herritan egingo diren herri-galdeketei babesa emateko helburuarekin, sindikatu eta enpresa batzordeetako hainbat delegatu gerturatu da Ezkurdi plazan eguerdian egindako elkarretaratzera.

Herri-galdeketei babesa eman dieten enpresa batzordeen artean, bozketak egingo diren udalerrietako Udaletakoak daude eta, hauekin batera, Iurreta, Berriz eta Atxondoko Udaletakoak ere. Aho batez edo gehiengoz babesa eman duten langile batzordeen artean, besteak beste, Gestamp Bizkaia, Tenneco, Cemosa, Rothemberger, Lince, Amig, Arania, Teknia, Fuchosa edo Simply enpresetakoak daude.

Aldez aurreko botoa

Bestalde, herri-galdeketa egingo den herrietan aldez aurreko botoa emateko aukera izango dute herritarrek.

Durangon eta Elorrion apirilaren 24tik maiatzaren 5era arte eman ahalko da aurretiko botoa; Durangon, Artekale kalean Gure Esku Dagok duen lokalean, aste bitartean 18:00etatik 20:30era eta larunbatetan 11:00etatik 14:00etara. Elorrion berriz, Berrio-Otxoa kalean dagoen lokalean, goizeko 11:00etatik 13:00etara eta 18:00etatik 20:00etara.

Abadiñon ere aldez aurreko botoa emateko aukera egongo da, kasu honetan, maiatzaren 2an, 3an, 4an eta 5ean, arratsaldeko 18:00etatik 20:00etara. Aurretiko botoa emateko tokia Gure Esku Dagok Traña-Matienako Trañaetxoste kalean duen lokala izango da.

La entrada Sindikatuetako ordezkariek eta enpresa batzordeek bat egin dute maiatzaren 7ko herri-galdeketekin se publicó primero en durangon.com.

EAJ, EH Bildu eta Herriaren Eskubideko zinegotziek babesa eman diote herri-kontsultari.

Durangoko alkatea den Aitziber Irigoras eta Eusko Alderdi Jeltzalea, EH Bildu eta Herriaren Eskubidea taldeetako zinegotziek euren babesa eman diote Gure Esku Dago ekimenak maiatzaren 7rako deitutako herri-galdeketari. 

Ekimenaren eragileen esanetan “azken hilabeteetan durangar asko batu dira herri ekimenera, galdeketa prestatu eta bultzatzeko asmoz”. Atzo, herri agintariek egin zuten bat deialdiarekin eta sostengua eman zioten kontsultari.

Durangoko Gure Esku Dagok gainera, bertso saioa antolatu du datorren zapaturako. Arratsaldeko 19:00etan Plateruena Kafe Antzokian egingo den ekitaldian Andoni Egaña, Igor Elortza, Jone Uria, Maialen Lujanbio, Unai Iturriaga eta Txaber Altube bertsolariek Maite Berriozabal gai-jartzaileak proposatutako gaiei erantzungo diote.

bertaratzeko sarrerak 10 euro balio du.

Bideo grabaketa Elorrion

Elorrioko Gure Esku Dagok, bestalde, irudiak grabatuko ditu domekan, Herriko plazan goizeko 11.00etatik aurrera, hainbat herritarrek egindako kantuari irudiak jartzeko. Ekimenaren eragileek dantzara gonbidatu dituzte “ume, gazte zein nagusi”.

La entrada Udalbatzaren gehiengoak eman dio babesa herri-galdeketari se publicó primero en durangon.com.

Abadiñoko Gure Esku Dago ekimenak maiatzaren 7an herrian egingo den herri-galdeketan erantzun beharreko galderak erabaki ditu, bi izango baitira herritarrek erantzun beharko dituzten galderak.

Gure Esku Dagoren talde eragileak egingo duen lehen galdera “Nahi al duzu euskal estatu burujabe bateko herritarra izan?” izango da eta horri “bai” edo “ez” erantzuteko aukera egongo da.

Baiezko erantzuna ematen dutenek bigarren galdera bat erantzuteko aukera izango dute: “Bai aukeratu ezkero: nahi al zenuke euskal estatu hori independientea izatea?” eta horri ere “bai” edo “ez” erantzun ahal izango zaio.

Herri-galdeta hau antolatu duen talde eragileak parte hartzeko deia egin die herritarrei, “erantzuna edozein delarik”.

La entrada Abadiñarrek bi galdera erantzun beharko dituzte maiatzaren 7ko herri-galdeketan se publicó primero en durangon.com.

Amorebieta B eta Zorrontzako taldeko jokalariek,

Zornotzako gazteek eta futboleriek babesa eman diote maiatzaren 7an herrian egingo den herri-galdeketari. Gure Esku Dago ekimenak antolatutako kontsulta hau Zornotzan ez ezik Durangaldeko eta Euskal Herriko zenbait herritan ere antolatu da.

Herriko futbolariek herri-galdeketari emandako babesa, Amorebieta B eta Zorrontzako taldeek zapatuan Txolongo futbol zelaian jokatutako derbiaren atarian nabarmendu zen. Partidua Lurraldeko Lehen mailakoa zen eta norgehiagoka hasi aurretik pankartari eutsi zioten talde bietako jokalariek. Partidua bera, bosnako berdinketarekin amaitu zen.

Bestalde, Gazte Eguna osaptu zuten zapatuan ere herriko haibat gaztek. Ospakizun hori zela eta gazte ugari gerturatu zen herri erdian dagoen Andres Nagelen eskulturaren aurrean argazkia egin eta kontsultari babesa emateko.

La entrada Gazteek eta futbolariek babesa eman diote herri-galdeketari se publicó primero en durangon.com.