Durangoko Kurutziaga ikastolak, Ausolanekin batera, Jantoki Eko-Arduratsuaren ziurtagiria jaso du Bureau Veritasen eskutik. Aitorpen hori emateko “elikadura osasuntsua, garapen jasangarria, zaintza, aisialdia eta elkarbizitza” uztartzen dituen proiektua baloratu dute.

Kurutziagak jasotako ziurtagiria Estatuan ematen den lehenengoa da eta ikastetxean egindako ahaleginaren emaitza da. Izan ere, “urteak daramatzagu proiektu integral hau lantzen”, Urko Rodriguez Kurutziagako zuzendariaren arabera.

Egunero, 800 menu baino gehiago prestatzen dira ikastetxeko sukaldean eta “elikadura osasuntsuaz haratago, eguerdietako tartean martxan jarritako proiektu integrala saritu dute”,  azpimarratu du Rodriguezek. Prestatutako janaria zero kilometrokoa izateaz gain, sasoiko produktuen kontsumoa, inguruko baserritarrekin elkarlana, naturarekin lotutako jolastoki zabala, aisialdia eta elkarbizitza batzen ditu egitasmoak.

Bazkaloste proiektua

Jantoki ereduaren inguruko aldaketa orain hamar urte abiatu zuten, guraso talde baten hausnarketa sakonaren ondoren. “Prozesuaren abiapuntuan, bazkari osasungarriagoa eta inguruko baserritarren produktuak kontsumitzea izan zen helburua”, Rodriguezen esanetan. Gainera, “sortzen den zaborra ere jasangarritasunaren irizpide berberekin kudeatzen da”.

Ikasleen aisia ere kontuan izan dute eta bazkalostea ikasleek elkarrekin gozatzeko une legez ulertzen dutenez “jantokiko zerbitzu kuotaren baitan kokatzen da”. Kurutziagako arduradunek zaintza, elkarbizitza eta aisialdia gehitu zizkioten proiektuari eta horrek jolas lekuaren espazioaren birplanteamendua eragin zuen.

La entrada Kurutziaga ikastolak Jantoki <br/>Eko-Arduratsuaren ziurtagiria <br/>jaso du Bureau Veritasen eskutik se publicó primero en durangon.com.

Berrizko Udalak antolatutako ‘Zapatuetan Berriz’ ekimenak edizio berriari ekingo dio asteburu honetan. Txanda bakoitzean gehienez 70 plaza egongo dira eta izena emateko epea etzi amaitzen da.

‘Zapatuetan Berriz’en helburua “aisialdian eta lagunekin euskararen erabilera modu ludiko eta dibertigarrian sustatzea da”, Udal arduradunen esanetan. Horrez gain, “ohiko lagun taldeetatik ‘ateratzea’ eta lagun berriak egitea” eragin nahi da.

Modu horretan, “parte-hartzaileei aisialdi hezitzailea eskaintzen zaie;  integrazioa, parekidetasuna eta aukera-berdintasuna landuz”. Horrekin batera, “Berrizko ingurunea ezagutzea eta errespetatzea, kultura-aniztasuna sustatzea eta haurren garapen psikomotorra, kognitiboa, kritikoa, emozionala eta afektiboa bultzatzea” ahalbidetuko da.

Zapatu honetan abiatuko den edizioa, otsailaren 17an, martxoaren 2 eta 16an eta apirilaren 13an eta 27an burutuko da eta Topalekua eskolako patio estalia izango da. 16:00etatik 17:30era izango diren saioetan Haur Hezkuntzako 4. eta 5. mailakoak eta Lehen Hezkuntzako 1. eta 2. mailakoak parte hartuko dute, eta 18:00etatik 19:30era Lehen Hezkuntzako  3., 4., 5. eta 6. mailakoak.

Txanda bakoitzean gehienez 70 plaza egongo direnez, beharrezkoa balitz, zozketa egingo litzateke. Egitarauko jarduerak, ordutegiak eta izena emateko formularioa Berrizko Udalaren webgunean daude eskuragarri. Izena emateko azken eguna etzi, otsailaren 2a, izango da.

Zalantzak argitu nahi dituztenek zapatuetanberriz@gmail.com e-mailera idatzi dezakete.

La entrada Asteburu honetan hasiko da ‘Zapatuetan Berriz’ ekimena se publicó primero en durangon.com.

Berrizko Udalak hilaren 21etik aurrera ekingo dio berriro haur eta gazteei zuzendutako ‘Zapatuetan Berriz’ ekimenari. Aisialdirako gune honen helburu nagusia, aisialdian eta lagunekin euskararen erabilera modu ludiko eta dibertigarrian sustatzea da.

Eskolako patio estalia topaleku izango duen aisialdi programa honek, “ohiko lagun taldeetatik ‘ateratzea’ eta lagun berriak ezagutzea” ahalbidetzen du, Udal arduradunen arabera. Horrela, parte-hartzaileei aisialdi hezitzailea eskaintzen zaie, integrazioa, parekidetasuna eta aukera-berdintasuna landuz.

Gainera, “Berrizko ingurunea ezagutzea eta errespetatzea, kultura-aniztasuna sustatzea eta haurren garapen psikomotorra, kognitiboa, kritikoa, emozionala eta afektiboa” bultzatzeko aukera ematen du.

‘Zapatuetan Berriz’ ekimena Haur Hezkuntzako 4. mailatik, Lehen Hezkuntzako 6. mailara bitarteko ikasleak hartzen ditu eta 15 egunean behin egingo da, urtarrilaren 21etik aurrera. Haur Hezkuntzakoak eta Lehen Hezkuntzako lehen eta bigarren mailakoek 16:00etatik 18:00etara izango dute hitzordua eta Lehen Hezkuntzako 3., 4., 5. eta 6. mailakoek 18:00etatik 19:30era. Txanda bakoitzean, gehienez, 70 plaza egongo dira.

Egitarauko jarduerak, ordutegiak eta izena emateko formularioa esteka honetan daude eskuragarri eta zalantzak izanez gero, zapatuetanberriz@gmail.com helbidera idatzi daiteke. Izena emateko azken eguna urtarrilaren 18a izango da.

La entrada Haur eta gazteei zuzendutako ‘Zapatuetan Berriz’ ekimena hilaren 21ean hasiko da berriro se publicó primero en durangon.com.

Abadiñon eta Mallabian uda honetan egingo diren udalekuetarako izena emateko epea ireki dute herri bietako Udalak.

Abadiñon egingo diren Ludoteka eta Herri Udalekuko programak 3 eta 12 urte bitarteko umeei zuzenduta daude eta parte hartzeko ezinbestekoa da udalerrian erroldatuta egotea edo bertan ikastea.

Ludotekaren jarduera 2016 eta 2019 artean jaiotako umeei zuzenduta dago, eta Zelaieta Eskolan egingo da ekainaren 27tik uztailaren 15era bitartean, 9:30etik 13:30era. Herri Udalekuak programa berriz, 2010 eta 2015 artean jaiotako umeei dago zuzenduta, eta jarduerak data eta ordutegi beretan egingo dira Traña-Matiena Eskolan.

Jarduera horien prezioa 80 eurokoa da aldi osorako eta ezin izango da aste bakarrerako izena eman. Bigarren semeak edo alaba zein familia ugariek hobariak izango dituzte.

Aurten, kontziliazioa errazteko helburuarekin, behar duten familiek haurtzaindegi-zerbitzua eskatu ahal izango dute doan.

Izen ematea Errota Kultur Etxean eta Udal Mediatekan egin daiteke, astelehenetik ostiralera, 9:00etatik 20:00etara, ekainaren 6a arte.

Mallabiko udalekuak

Mallabiko udalekuak 4 eta 16 urte bitarteko haur eta gaztetxoei zuzenduta daude eta ekainaren 27tik uztailaren 22ra burutuko dira, astelehenetik ostiralera 9:30etik 13:00etara. Guztira 60 plaza eskainiko dira eta udalerriko umeek lehentasuna izango dute.

Izen-emate orriak Kultur Etxean daude eskuragarri eta egitasmoaren berri emateko asmoarekin familientzako informazio-bilera egingo da ekainaren 23an, 18:00etan,  parkeko aterpean.

La entrada Abadiñoko eta Mallabiako udalekuetan parte hartzeko <br/>izen-ematea ireki dute se publicó primero en durangon.com.

Urriaren 3an Zaldibarren abiatuko den Zapatublai egitasmoan parte hartzeko izen-ematea astelehenean, hilak 14, amaituko da. Inskripzioak Udaletxean egin behar dira eta aurten ere plaza kopuru mugatua eskainiko da.

Zaldibarko Udalak antolatu eta Txatxilipurdi Elkarteak kudeatzen duen ekimena 3 eta 12 urte bitarteko ume eta gaztetxoei zuzenduta dago. Helburu nagusiak ondo pasatzea eta partaideen artean euskararen erabilera sustatzea nahi da. Gainera, umeak lagunarteko giro jatorrean hezitu eta beraien parte hartzea bultzatu eta natura errespetatzen irakastea nahi zaie.

Covid-19aren osasun-larrialdia dela eta, gaitzak behartutako egoerari egokitu behar izan dira ekimen guztiak. Osasun-alerta dela eta, metodologia zein elkartzeko egunak aldatuko egingo dira.

Aurten, adinaren arabera osatutako bi txanda egingo dira hilean zehar; hau da, lehenengo txandak hileko lehenengo eta hirugarren asteburuan hartuko du parte eta bigarren txandakoak berriz, bigarren eta laugarren asteburuan bilduko dira. Saioak zapatuetan izango dira 16:00etatik 19:00etara.

Txatxilipurdi Elkarteko begiraleek bideo bat argitaratu dute, Covid-19aren ondorioz hartutako neurriak azaltzeko.

La entrada Zaldibarko Zapatublai ekimenean parte hartzeko izen-ematea astelehenean amaitzen da se publicó primero en durangon.com.

Durangoko Amankomunazgoaren Euskara Zerbitzuak ume eta gaztetxoen aisialdiko begirale eta zuzendari tituluak lortzeko ikastaroak eskainiko ditu aurten ere, Bizkaiko Foru Aldundia eta Eusko Jaurlaritzaren laguntzarekin. Ikastaroak doan izango dira Abadiño, Atxondo, Berriz, Durango, Elorrio, Iurreta, Izurtza, Mañaria eta Zaldibarko herritarrentzat.

Formakuntza ikastaroak Durangaldean bertan emango dira urritik maiatza arteko asteburuetan. Ekimenaren helburua “aisialdian umeekin eta gaztetxoekin ari diren profesional euskaldunak prestatzen da, berebizikoa baita umeek eta gazteek eredu euskaldunak izatea”, Amankomunazgoaren euskara zerbitzuko arduradunen arabera.

Begirale ikastaroan parte hartzeko beharrezkoa da 2016ko abendurako 18 urte beteta izatea. Zuzendari ikastaroaren kasuan, berriz, parte-hartzaileek 21 urte izan beharko dituzte, eta aurretiaz begirale titulua aterata izan behar dute. Begirale ikastaroan izena emateko epea irailaren 16an amaituko da, eta zuzendariarenean irailaren 30ean.

Inskripzioak Amankomunazgoko Euskara Zerbitzuan (Laubideta 6, Durango) egin behar dira eta matrikula egiteko argazki bat, nortasun-agiriaren fotokopia eta errolda-ziurtagiria eraman behar dira. Zuzendari ikastaroan matrikulatu nahi dutenek begirale titulua ere aurkeztu behar dute.

Informazio gehiago jasotzeko 946232522 telefonora deitu edo euskera.mdurango@bizkaia.org helbidera idatzi behar da.

La entrada Amankomunazgoak doako ikastaroak antolatu ditu aisialdiko begirale eta zuzendarientzat se publicó primero en durangon.com.