Santo Tomas ospakizunekin hasiko dira Gabonak Elorrion

Santo Tomas eguneko ospakizun bikoitzarekin hasiko dira ostiralean Elorrion, Gabon egunetarako prestatu den egitaraua. Alde batetik, ikastetxe desberdinetako ikasleek ohiko merkatua egingo dute plazan eguerdiko hamabietan hasita eta ordu berean abiatuko dira Mendraka auzoko Santo Tomas baselizan antolatutako ekitaldiak. Eguneko egitaraua Berriotxoa Orfeoiak arratsaldeko zazpietan hasita eskainiko duen kalejirarekin osatuko da.

Igandean Merkatu txikia egongo da plazan eta eguerdiko hamabietatik arratsaldeko hiruretara aukerako erosketak, eskulanak, opariak eta bigarren eskuko tresna eta arropak erosteaz gain, trukea egiteko aukera egongo da. Merkatuan mahaia kokatu nahi dutenek izena eman beharko dute 695747343 telefonoan (Luis Mari) eta 10 euro ordaindu.

Arratsaldeko bostetan familian ikusteko ‘Boli bili boli’ txotxongilo ikuskizuna eskainiko Pantzart konpainiak. Juan Cruz Igerabidek idatzitako poematxo eta ipuin laburretatik abiatuta, bertsoak, marrazkiak, abestiak eta paperezko objektuekin egindako ikuskizuna sortzen da.

Asteazkenean ospatuko den Gabon egunean izango da Olentzeroren etorrera eta ikazkinak arratsaldeko bostetatik aurrera jasoko ditu plazan herriko umeen eskaerak. Ordu bete geroago Besaide dantza taldearen ekitaldia hasiko da.

Ostegunean, eguerdiko hamabietan izango da meza nagusia parrokian eta elizkizunean Parrokiako Koruak abestuko du.
San Esteban eguna ospatuko da Berrio auzoan ostiralean eguerdiko hamabietan hasita eta bertan Besaide dantza taldeko dantzari eta txistulariak arituko dira.

Gabonetako egitarauak jarraipena izango du 28an izango den San Txibiri herri lasterketarekin, haurrentzako parkearekin, Erdella Mendi Taldeak antolatutako mendi irteerekin eta Errege Magoen gauarekin, besteak beste.