Oier, Ekaitz, Dabid, Julen???

Garai bateko apustu giroa etortzen zait burura..

Serafín Amezua “Txaraka” abadiñarrak, Atxartetik barrena, Urkiolara korrika igotzeko ohitura omen zuen. Ziur, lagunekin eta herrikoekin apustuak egiten zituela: baietz edo ezetz aurreko marka hautsi?

Urkiola izan da, hain zuzen, apustuak egiteko Durangaldeko elementu fetitxea. Erakargarritasun berezia du. Lagun kuadrilletan sarri agertu da apustuaren erdigune moduan. Ezetz Urkiola 5 aldiz igo eta bajatu 5 ordutan! Ezetz ordu betean baino gutxiagoan Durangotik Urkiolako Santutegiko bidea eta buelta egin! Nonbait entzuna dut ere, norbaitek bizikletan atzeraka igotzen zituela mendateko maldatzarrak…

Bada, giro hori etortzen zait burura atletismoan bizi dugun garaiari erreparatuta. Errepideko korrikalariez ari naiz. Aspaldiko partez, lagun artean eta familia giroan galdera egiten diogu alboan dugunari: nork irabazi du San Silbestrea? Eta nahiz eta atletismo kontuak gertutik gertura ez jarraitu, ezagunak ditugu hiru, lau edo dozena erdi korrikalari. Poztekoa. Globalizazioak ez du oraindik guztia akabatu…

Tokian-tokiko kirolariek, inguruko kirol probetan, bertako jendea emozionatzea ikaragarria iruditzen zait. Dirudiena baino garrantzitsuagoa dela esango nuke, beharrezkoa, herri-giroa aberasteko. Imajinatzen duzue Ekaitz, Oier, Dabid eta Julenen arteko desafio bat? (Ziurrenik izen asko utziko ditut ahaztuta). Bada, banakako erronka batean ez bada, binakako desafio batean imajinatzen duzue gure eskualdean piztuko zuten ikusmina? Giro sanoan, noski, bai euren lehiari dagokionez eta baita afizioari dagokionez (Gorospe eta Marinoren garaiak “in memoriam”).

Bide batez, imajinatzen duzue Durangaldeko korrikalariek elkarte edo klub bakarrean elkartuko balira eta eurek entrenatzeko bideak modu ofizialean-edo seinaleztatuko balituzte? Eta lan hori egiteko erakundeen laguntza izango balute? 5, 10, 15, 21 kilometroko ibilbideak, Durangaldetik, mendi zein baserri-bideetatik…

Atletismo alorrean, beste askorekin gertatzen zaidan moduan, “superpotentzia” bat izan gaitezkeelako irudipena dut. 

Julen Orbegozo kazetaria da