Madrilera ala Finlandiara?

Eusko Jaurlaritzako Uriarte Hezkuntza
Sailburua Madriletik datozen aginduei men
egiten ikusten dugu aspaldion, besteak beste,
3. mailako azterketak defendatuz eta, bide
batez, jarrera horrek LOMCE onartzea
suposatzen duela ezkutatuz.

Nago, Madrilera barik Finlandiara
begiratuko bagenu beste kuku batek joko
ligukeela. Izan ere, hango hezkuntza
sistematik badugu zer ikasi. Urrunago joan
gabe hortxe dugu egunokaz argitaratu den
eskola-jazarpenari (acoso escolar) buruzko
finlandiar programa baten emaitza.

Finlandiako Gobernuak KiVa izeneko
programa arrakastatsua du abian, bertan
azpimarratzen dute jazarpenean (akosoan) hiru
protagonista izaten direla beti:

• Erasotzailea (acosador),
• Biktima
• Lekukoak (ikusleak)

Hezkuntza eremutik hiru arloak aztertu
behar ei dira arazoa saihestu gura bada.
Biktimari laguntza eskaini behar zaio,
erasotzaileari/ei jarrera aldarazi eta lekukoei
heuren portaeraren eragina azaldu eta
jabetuazo.

KiVa programaren berezitasuna taldean
zentratzean datza. Talde horretan lekukoek
garrantzia handia dute, izan ere gehienetan
lekukoen pasibotasunak erasotzailearen
kolaboratzaile bihurtzen ditu.

Arazoa konpontzeko ez da zertan
biktimaren jarrera aldatu, biktima irekiagoa
edo ausartagoa izan dadin, ezpabeze
lekukoengan eragin behar da. Lekukoek
erasoan parte hartzen ez badute, erasotzaileak
bere jarrera aldatu egingo du.

Aipatutako programa burutzeko, 7, 10 eta
13 urteko ikasleek, hogei bat klase hartzen
dituzte. Era berean biktimei heuren egoera
salatzea ahalbideratzen zaie, gutunontzi birtual
baten bidez. Ikastetxe bakoitzean hiru lagunez
hornitutako batzorde bat dago, indarkeria
kasuren bat antzeman bezain laster lanean
jartzen dena .

Finlandian ere txakurrak ortozik ibiliko dira
baina hezkuntza arloan badugu nora begiratu,
nik uste. Geldotasunak, inertziak eta
immobilismoak ez garamatzate inora. Behin
eta berriro frogatzen da ostera,
profesionaltasunak eta arazoak konpontzeko
gogoak mirariak egin ditzakeela.

Eta Madrilera barik Finlandiara begiratuko
bagenu?

http://www.kivaprogram.net/

http://eu.wikipedia.org/wiki/

Finlandia

Marisa Barrena psikopedagogoa da