Josi eta josi

Urriaren 12 hasiera eman zitzaion Bizkaiko Bertsolari Txapelketaren azken saioa abenduaren 20an izango da. Hainbat berba eta esaldi josi behar izan dituzte gure ahozko literatura sortzaileek euren gaitasuna erakusteko eta azken txanpara heltzeko.

Oraingoan, gure eskualdeko 6 bertsolariak ez dira azken saioan izango. Alde batetik lastima, ezagunak ditugulako eta bertsolari ontzat dauzkagulako. Edozelan be lerro hauetatik; Animo neska-mutilok. Lehiak horixe dauka, batzuetan gora, besteetan alderantziz, baina ez etsi, hurrengo batzuk be izango dira-eta.

Aitortu behar dut gureak ez egoteak pena sortzen didan arren, emakume naizen aldetik poztasun handi bat ere badaukadala. Aurtengo finalean 4 gizon eta 4 emakume izango dira aurrez aurre: Iratxe Ibarra, Etxahun Lekue, Arkaitz Estiballes, Onintza Enbeita, Jone Uria, Oihana Bartra, Fredi Paia eta Xabat Galletebeitia. Pentsa ezina orain dela zenbait urte, ametsa.

Dena den badut arantza bat neure baitan. Epaimahaian ematen ote da parekidetasun hori? Oker ez banago Amorebieta-Etxanon 5 gizon eta emakume bat izan ziren epaimahaiko, gehi idazkaria. Bilbon desoreka bera egongo ote da? Eta gai-jartzaileak? Uste dut biak ala biak puntu garrantzitsuak direla oreka eta normaltasunerako bidean.

Arantzak arantza, uste dut aurtengo zortzikoteak Bilboko Bilbao Arena saskibaloi kantxari beste kolore bat emango diola, baita normaltasunaren doinua eta parekidetasunaren tonua ere.

Marisa Barrena psikopedagogoa da