Ikur frankistak

Kili-Kiliren sortzailea izan zen Jose Antonio Retolazari Arrazolan egin dioten kabia ezagutzea otu eta, Untzilloko iturbururantz abiatu ginen Kili-Kilikide izandako zenbait lagun.

Gustora gindoazen Arrazolan barrena, parajearen edertasunez gozatzen, harik eta, bide ertzean, baserri edo tejabadako orman zegoen ikurra ikusi arte. Susto galanta hartu genuen. Harrituta geratu ginen, non eta Arrazolan ikur frankista aurkituta.

Egia esan ez dakit horrelako zenbat ikur geratzen diren gure inguruan.  Azken urteotan herririk gehienetan ari dira ikurrok kentzen. Esate baterako, Galdakaoko Udalak memoria historikoa berreskuratze aldera, urte hasieran  martxan jarri zuen udalerrian zeuden plaka eta ikur frankistak kentzeko ekimena eta prozesu horretan behar izan diren ertz guztiak aztertu ondoren, hasitako kentze-lana amaitu dute azaroan zehar. Guztira 60 plaka.

Nafarroan ere ari dira lanean. Dagoeneko 141 herri aztertu dituzte, eta horietan 224 ikur frankista aurkitu dituzte. Nafarroako Gobernuak oraintsu onartu du behin-behineko zerrenda hori; baita han agertzen diren ikurrak kentzeko plana abian jartzea ere.

Nire iritziz, ondo legoke gurean ere beste horrenbeste egitea. Gizarte demokratikoa eraiki nahi badugu, demokraziaren elementuak indartu behar dira. Gainontzekoak soberan daude.

Marisa Barrena psikopedagogoa da