Hiru aste, hiru erailketa

Azken egunotan Katalunian jarrita ditugu begi eta belarriak. Hunkituta. Harrituta. Ez da gutxiagorako. Izan ere, historia egingo duten lerroan ari dira idazten katalanak.

Halere, ezin ahaztu gure inguruan gertatzen ari diren indarkeria matxistak eragindako erailketak. Oraingoz marka guztiak hautsi ditu gurean matxismoak. Hiru astetan, hiru erailketa.

Uztaitzen 23 urteko Melodie Masse hilotz aurkitu zuten bere etxean bortxa zantzu handiekin irailaren 13an. Handik egun gutxira, irailaren 28an, Noelia Noemi hil zuen bere bikoteak Sestaon. 32 urte zituen.

Atzo berriz beste erailketa baten albistea heldu zitzaigun. Honela biltzen dute egunkariek:  “Gasteizko emakume bat hilda aurkitu dute Miranda Ebron. Arma zuriarekin egindako zauriak ditu gorputzean. Haren bikotekidea atxilotu egin dute. A.B.J. hilda topatu dute. Aparkaleku batean zegoen auto batean aurkitu dute gorpua. 44 urte zituen emakumeak”

Indarkeria matxistaren aurka gaudenok berriro egingo ditugu elkarteratze deialdiak, berriro jarriko gara pankarta atzean.  Amorrua eta nazka gehitu egingo zaigu. Erakundeetatik indarkeria matxistari egiten zaion jaramon eskasak frustrazio sentsazioa areagotu egingo digu.

Halan zein holan, ezin dugu mutu geratu. Ohi bezala Emakumeen Mundu Martxaren protokoloa jarraituz kalera irtengo gara, asteon bigarren aldiz. Ondo legoke, elkarretaratzeak egiteaz gain, eraildakoen izena herrietako gune publikoetan jartzea, berau ezagutaraziaz eta memoria indibiduala landuaz. Edota muralak margotzea dolu kolektiboa eta salaketa mezua ahalik eta zabalena izan dadin.

Mugi gaitezen. Herri libre eta zoriontsua eraiki nahi badugu, matxismoaren kateak hautsi egin beharko ditugu, osterantzean, ez gara ez libre, ez zoriontsu izango.

Marisa Barrena psikopedagogoa da