Defendatu beharra? Bai, zoritxarrez

Batzuetan, aste hasieretan gauza interesgarriak heltzen jakuz. Niri, lehengo egunean, eguerdiaren bueltan ???Autodefentsa feminista ikastaroa??? Zornotza nire herrian emongo dalako albistea heldu jatan.

Hara!

Ez dakit zuri, baina niri gauza mordoa ekarten deust gogora. Lehenengotik hasita, sexuen arteko borroka bizian murgilduta gagozala eta emakumeok beste sexuarengandik jaso daikeguzan eta jasotzen doguzan erasoei aurre egiten ikasi behar dogula. Azken finean, geure burua defendatzen ikasi behar dogula.

Auto-defentsa. Zer ete da hori? Nork bere burua defendatu behar izatea, burua, lepoa, hankak, besoak, eskua, aurpegia…; baina, aldi berean, gure askatasuna, gure duintasuna, gure izen ona???

Beharra…. hau tristura!

Baina, aldi berean, errealitate gordina.

Emakumeen kontrako indarkeriaren aurkako aldarriak egiteko hilabetea hasi barri dogu, hilaren 25a dalako indarkeria matxistaren kontra egiteko nazioarteko eguna, beti gogoan izan beharrekoa, bidean geratu jakuzan emakume guztien izenean, burua altxatzeko ahaleginean dagozan guztien izenean, beren burua harro eroan behar daben neska gazteen izenean, Durangon, eskualdean, Euskal Herrian eta mundu osoan erasoak sufridu dabezan guztien izenean…

Auto-defentsaren beharrik egongo ez dan gizarteagaz egiten dot amets. Martin Luther King-ek egiten eban moduan:

Amets bat daukat!

Bien bitartean, defendatzen ikasi beharko dogu emakumeok, ukabilez emon gura deuskuezan kolpeen kontra, duintasuna kendu gura deuskun matxismoaren kontra, gure askatasuna birrindu, txikitu eta ezereztu gurean ibilten diranen kontra.

Baina, gauza guztien ganetik, gizakiok, gurasook eta gizarte eragileok gure seme eta alabak hezi beharko doguz, neskak, beren askatasuna defendatzen ikasi dagien eta mutilak emakumearen askatasunaren beldur izan ez daitezan.

Ez dogu ez, lan makala!!!

Karmele Aurtenetxe Elorriaga kazetaria da