Bitxoak

Euli madarikatuak! Etxeko ordenagailua pizten ari naiz eta han jarri dira zirikatzen. Pare bat testu idatzi behar ditut eta ez dakit idatziko ditudan, bi euli jarri dira ordanagiluaren pantailan eta arreta guztia berengan joaten zait. Ni despistatzera jolasten ari direla ematen du eta begirada pantailara itzultzen dudanerako hortxe daude. Madarikatuak!

Orduak aurrera joan ahala eta urduritzen hasia naiz. Euli hauek ez dute, antza denez, alde egiteko asmorik. Blum, delakoa bota behar diet eta ea horrela alde egiten duten. Ez naiz konzentratzen eta aipaturiko bi testuak entregatu behar ditut. Hau da panorama!

Udako euliak dira gutxien gustatzen zaizkidan bitxoak. Euliekin batera sugeak ere ez dira nire gustokoak . Udako bisitariak izaten dira eta aurten gainera, bisitariak etxera etorri dira. Susto galanta hartu dut.

Bero galanta egin du azken egunotan eta nire etxeko tremometroa 40º iritsi da. Bero handia egin duen horietako egun  batean bisita ez atsegina izan genuen gure etxean. Etxe barruan. Suge bat etorri zitzaigun. Suge bat etxe barruan. Ah! Ez duzue sinistuko baina hala zen. Gaueko hamahikak ziren,  telebista itzali eta oherako bidea hartu nuen. Argia piztu eta han suge gris handi bat zegoen. Ohikatu eta eskilaretatik behera jeisten hasi nintzen kontrol barik. Ene…ezin dut sinistu baina suge bat da!

Ezin lo hartu. Nire oihua oso indartsua izan zenez alde egingo zuela pentsatu nuen. Baina etxe barruan zegoelakoan nola harrapatu? Dena bilatzen armairutik, ohe azpitik …Baina keba, ezin nuen aurkitu. Bapatean nire amonak esandakoa gogoratu nuen. Sugei esnea gustatzen zaie. Halako batean, plater batean esnea jarri eta ea aurkitzen dudan. Bien bitartean, senitartekoengana gaua pasatzera.

Lo hartzea kostatu zitzaigun baina goiza heldu zenean berriro nere etxera joatea erabaki nuen. Eskilaretatik gora, urduri eta han zegoen, suge madarikatua  platerraren gainean esnea edaten. Palo bat hartu eta zass, jo nion buruan eta mozkortuta zegoen bezala leku batetik bestera aritu zen.  Ondoren beste zass bat eman nion eta oraingoan, bai,  hil egin zen. Plastiko bat hartu eta zakarrontzira bota. Ohe azpitik begiratu  eta sugearen kaka, arrautzak, botaka, zer ote? Ondo-ondo garbitu eta lasaitu nintzen.

Gure inguruko baserritarrek emandako errezeta kontutan hartu eta sugea harrapatzea lortu nuen. Esnea jarri eta bertaratzen direnean, palo batekin zass! Inguruko nagusien errezeta baliogarria izan zait. Esango nuke, baserrietatik sugeak dabiltzatela baina baita ere hiriko etxeetan. Lasai! Esnea eta inguruan palo bat edukiz gero, dena konpondu daiteke. Udako bisitari ez atseginak dira, badakit baina zer egingo diogu…ba?

Idoia Azkorbebeitia kazetaria da