Matienako Gazte Asanbladako kideek auzo erdialdean utzi zuten Zaldua errekan batutako zaborra

Matienako Gazte Asanbladako hainbat kidek eta laguntzera hurbildu ziren auzokideek, pneumatikoak, hagunak, erosketa karroak, uralitak, egurrezko paletak, bidoiak, plastikoak eta aulkiak jaso zituzten, besteak beste, zapatuan Zaldua errekan egindako garbiketan.

Ekimenean parte hartu zuten auzokideek lau aldiz bete zuten zaborra pilatzeko erabilitako furgoneta eta “hala ere errekan dagoen zaborraren zati txiki bat baino ez genuen atera”, ekimenean parte hartu zutenen esanetan. Bildutako guztia  herri erdian utzi zuten baina “hurrengoan beharrezkoa bada udal batzarrera eramango dugu” jakinarazi zuten sare sozialen bidez.

Matienako Gazte Asanbladako kideek zapatuan egindako garbiketa, bigarren aldiz burututako ekimen erreibindikatzailea da. Izan ere, beste garbiketa bat egin zuten aurreko urtean eta horren ostean alkateak errekak garbitzeko konpromisoa hartu zuen.

“Tristea eta lotsagarria”

Gazteek, hala ere, “errekak aurreko urtean bezain zikin” daudela salatu dute. Horregatik, “tristea eta lotsagarria” iruditzen zaie udalaren jokabidea “urte osoan ez duelako ezer egin errekak garbi mantentzeko” eta “ingurumenarekiko duen jarreragatik”.

“Agian udaletxeak uste du Matienako Gazte Asanbladak eurek egin beharreko lana egingo duela urtero” adierazi ondoren, argi eta garbi esan dute “ez garela inoren morroi, eta ez dugula onartuko gure ekimenak erabiltzea euren aurpegia garbitzeko”.

Burututako ekimena politizatzen saiatu diren pertsonak egon badira ere, “argi utzi nahi dugu ekimen hau eta Matienako Gazte Asanblada ez dagoela inongo alderdi politiko baten atzean, antolatutako ekimenak auzolan ekimen herrikoiak baitira”.