Izurtzako alkateak 1.500 euroko soldata gordina jasoko du egun erdiko lanaldiagatik

Izurtzako Udalbatzak Lorea Muñoz alkatearen lanaldi erdiko liberazio onartu zuen, EH Bilduren botoekin eta EAJaren abstentzioarekin. Saio berean Moñozek jasoko duen soldata ere erabaki zen eta urtean 21.000 euroko lansaria erabaki zen, hau da, hilean 1.500 euroko soldata gordina.

Udalbatzaren bilera berean “batzorde informatiboak eta hauen maiztasuna orain arte bezala mantentzea gomendagarria zela ikusi genuen”, jarduneko alkatea den Oihane Irastorzak azaldu zuenez. 

Lau izango dira, beraz, batzorde informatiboak eta batzar bakoitzera doazen zinegotziak 159 euro jasoko dituzte. Hirigintza, ingurumena eta nekazaritza batzordea hilero bilduko da; Kultura, osasuna, kirola eta parte-hartzearena bi hilerik behin bilduko da; Ogasuna, kontu batzorde berezia eta barne araubide aparteko komisioaren bilerak hiru hilabetez behin izango dira eta Hirugarren adina, inmigrazioa, berdintasuna eta enpleguarena hiru hiletik behin bilduko da. Ohiko udalbatzaren bilkurak bi hiletik behin izango dira.

Legegintzaldiko lehen udalbatzan beste erakunde batzuetako ordezkariak izendatu ziren eta Mankomunitateko plenoaren ordezkariak Lorea Muñoz eta Oskar Zarrabeitia izango dira EH Bildu eta EAJtik, hurrenez hurren. Erakunde horretako gobernu batzordeko kidea eta EUDEL zein Bilbao-Bizkaia Ur Partzuergoko ordezkaria Muñoz izango da.

Oihana Irastorza zinegotziak ordezkatuko du Izurtzako Udala Urkiola Landa Garapen eta Urkiolako Parke Naturala elkarteetan; UEMAko batzarretara Iker Ballarin joango da eta Julio Cuesta izango da Erralde hiltegian eta Basoa konfederakundeko ordezkaria.