Iurretako institutuko ordezkari bat izan da Bruselan egindako Confint konferentzian

Iurretako Juan Orobiogoitia institutuko DBH 4. mailako Ane Unzalu, Euskadiko ordezkaria izan da Bruselan maiatzaren 19tik 23ra bitartean burututako Confint-en, hau da, Zaindu dezagun Lurra Gazteen Nazioarteko Konferentzia.

Ane Unzalu Estatuko beste hamar ikaslerekin batera izan da Bruselan, tarteko berarekin batera Euskadi ordezkatzen zuen Barakaldoko Beurko institutuko beste ikasle bat. Konferentzian Europa osoko beste ikasleekin eztabaidatu dituzte aldez aurretik hartutako erabakiak.

Brusela lan saioak ingurumena eta jasangarritasuna izan dute abiapuntu, azken asmoa mundua nolakoa izan beharko litzatekeen gazteen ikuspuntutik hitzartzea baita. Bertan hartutako erabakiak eta hitzartutako manifestoa agintariei luzatu zaizkie.

Eskola jasangarriak

Confint egitasmoa Agenda XXI ekimenaren barne ‘Eskola jasangarriak’ izendatutako ikastetxeetako ikasleek lantzen duten prozesua da. Lehenengo, ingurumena eta jasangarritasunari buruz gai batzuk jorratzen dituzte eta horiek buruzko erabaki eta konpromiso batzuk hartzen dituzte ikastetxean bertan.

Erabakiak eta konpromisoak, Euskadiko Confint-en eztabaidatzen dira berriro eta bertan hartutako konpromisoak Estatuko Confint-en partekatzen dira beste ikasleekin. Azkenik, Europa mailako Confint-en lantzen dira gaiak eta azken erabakiak hartzen dira.

Aurtengo Confint-eko lanak maiatzaren 18an hasi zituzten Juan Orobiogoitia Institutuan eta maiatzaren 27an Busturian batzartu ziren Euskadiko ikastetxeetako 80 ikasle inguru. Saio horretan hitz egindakoa eta bertan hartutako erabakiak Iñigo Urkullu lehendakariaren aurrean azalduko dituzte Busturiko Madariaga dorretxean ekainaren 2an egingo den bileran.