Ingelesa eta euskara uztartuko dituzte Iurretan gauzatuko diren Udako Tailerrak

Euskaraz eta ingelesez garatuko dira aurten ere Iurretako Udalak umeen aisiari alternatiba bat emateko asmoz antolatu dituen Udako Tailerrak. Antolatzaileen esanetan “modu hezigarri batean umeentzako aberasgarriak diren” ekintzak burutuko dira uztailean zehar, “beraientzat entretenigarri eta dibertigarriak” diren baliabideetan oinarrituta.

Tailerrak 3 eta 14 urte bitarteko umeentzat prestatuta daude eta, adinaren arabera, bost taldetan banatuko dira. 3 eta 4 urteko umeek euskaraz burutuko dituzte ekintzen %70a eta gainerako %30a ingelesez. 5 eta 6 urtekoek, 7 eta 8 urtekoak, 9,10 eta 11 urtekoek eta 12, 13 eta 14 urtekoek osatutako taldeak berriz, euskaraz burutuko dituzte ekintzen %50a eta ingelesez beste %50a. 

Bi hizkuntza praktikatzeaz gain, programa honen asmoa ikasteko interesa piztea da eta horretarako ludikotasunaz baliatuko da. Gainera, generoaren ikuspuntutik umeen garapena integrala sustatu, ingurumenarekiko errespetua landu edo kultura aniztasuna lantzen ere saiatuko da.

Jarraituko den metodologia dinamikoa eta parte-hartzailea izango da, non umeak protagonistak izango diren. Horrez gain, talde lana bultzatuko da, ekintzak era ludiko eta dibertigarri batean burutuz.

Programa osoa Iurretako eskola publikoaren lokaletan burutuko da eta ekintza gehienak herrian zehar eta aire librean egingo dira, bertan dauden baliabideak aprobetxatuz. Ekainaren 29tik uztailaren 24ra bitartean burutuko diren Udako Tailerren ordutegia goizeko 9.00etatik 14.30etara izango da.

Herritarrak lehentasuna izango dute

Bertan parte hartzeko lehentasuna izango dute Iurreta herrian erroldatutako umeak. Ondoren, Maiztegi Herri eskolan matrikulatutako umeak izango dira kontuan eta, azkenik, beste herrietako umeak, betiere izen-emateren arabera.

Udako tailerrak bat, bi, hiru edo lau asteko iraupena izan dezakete eta matrikularen prezioa iraupena eta umeen jatorriaren arabera ezarriko dira. Esaterako, herrian erroldatutako ume batek 58 euro ordainduko ditu astebeteko tailerrean parte hartzeagatik eta 233 euro lau astekoagatik. Iurretan erroldatuta ez dagoenak berriz, 87 euro ordainduko ditu aste beteko tailerragatik eta 350 euro lau astekoagatik.

Interesatutakoek www.iurreta.net web orrian edo Ibarretxe Kultur etxean eta Iurretako Udaletxean eskuragai dauden izen-emate orria bete behar dute eta apirilaren 13tik 24ra bitartean entregatu, goizeko 09.00etatik 13.30era edo arratsaldeko 15.00etatik 19.30era. Matrikularen zenbatekoa bankutik ordaindu behar da eta behin-behineko zerrendak ateratzean itzulketa ezinezkoa izango da.