Gerediagak izandako 130 juntakide omenduko dituzte gaurko festan

Gerediaga elkarteak bere 50 urteko historian izan dituen 130 juntakideak omenduko ditu gaur ospatuko duen 50. urteurren jaian. ‘Topa Gerediaga’ deituriko festak hainbat ekitaldi iragartzen ditu goizerako, baina elkarteko arduradunak izandakoen lana eskertuko duen ekitaldi nagusia eguerdiko 13.00ak aldera hasiko da.

Zuzendaritza batzordeko izandako 130 kide ingururi egingo zaie aipamen berezia eta Eneko Unzalu bitxigile mañariarrak beren-beregi ekitaldirako diseinatutako oroigarria jasoko dute. Maite Berriozabalek aurkeztuko duen ekitaldia borobiltzeko, Durangoko Orfeoia eta L’Atelier Dantza Eskolaren agerraldiak izango dira.

Ekitaldiaren ostean, 110 lagun bilduko duen bazkaria hasiko da Astolan bertan, Abadiñoko Udalak utzitako karpan. Bazkalostean Juan Antonio Aromak eta Antton Mari Aldekoa-Otalorak prestatutako kantu bildumarekin kantu-erromeria egingo da.

Gerediagak deia zabala egin du eta “bazkideei ezezik Durangaldea aintzat hartzen duten pertsonei” ospakizunetara gerturatzeko gonbitea luzatu die. Aipaturiko omenaldia hasi aurretik, umeentzako arkeologia tailerra, argazkizaleen ‘photowalk’ topaketa eta Durangoko ikerketagaiei buruzko eztabaida egongo dira.

‘Hamabi harrien ahotsa’ liburua

Bestalde, Gerediaga elkartearen 50 urteko historia eta istorioak batzen dituen liburua idatzi dute Jon Irazabalek eta Raquel Calvok. Obra hori datorren asteazkenean, ekainak 10, aurkeztuko da Durangoko Kurutzesantu museoan, arratsaldeko 19.00etan. Liburua hurrengo astetik aurrera izango da salgai Durangaldeko ohiko liburu-dendetan.