Gazteei zuzendutako ‘Zergatik ez’ tailerrak eskainiko ditu Berbaro Elkarteak

Durangaldeko 16 eta 18 urte bitarteko 500 gazte inguruk jasoko dute aurten Berbaro Elkarteak eskainitako ‘Zergatik ez?’ tailerra. Durangoko Merinaldearen Amankomunazgoaren laguntzarekin antolatutako sentsibilizazio ekimen honen helburua euskararen erabilera soziala bultzatzea da.

Durangaldeko hainbat ikastetxetan emango den ‘Zergatik ez? tailerreko saioetan “hizkuntzekin ditugun harremanei buruz hausnartzen da, eta, horren bitartez, euskararen aldeko jarrera sustatzen da”, antolatzaileen esanetan.

Ekimen honen bitartez “euskararen erabilera sozialaren inguruko hausnarketa gune bat sortu” eta gazteek, hiztun gisa une oro aukeratzen dituzten hizkuntza jarrerek duten eraginaz hausnarketa egingo da. Gainera tailerren bidez “euskararekiko jarrera baikorrak sustatu” eta “euskararen errealitatearen eta etorkizunaren ikuspegi baikorra” azaleratzeko asmoa du.

Otsaila eta martxoa bitartean burutuko den ‘Zergatik ez? ekimenean Juan Orobiogoitia, Kurutziaga Ikastola, Fray Juan de Zumarraga, Txintxirri Ikastola, Ibaizabal Ikastola, Elorrio BHI, San Antonio Santa Rita Ikastetxea, Lourdesko Ama, Abadiño BHI eta San Jose Jesuitak Ikastetxeak parte hartuko dute.

Aipaturiko helburuez gain “Durangaldeko gazteak elkar ezagutzeko eta euren esperientziak trukatzeko gazte euskaldunen sare bat” osatzeko asmoa agertu dute Berbaro Elkarteko kideek, Zergatik ez? tailerrak oinarri hartuta.